Парис хотод төвтэй олон улсын мэдээллийн Agence France-Presse (AFP) агентлаг Монголын ЛГБТ хүмүүсийн эрхийн асуудлыг хөнджээ. Тус нийтлэлд дурдсан зарим хэсгийг орчуулан хүргэж байна. Монголын нөлөөлөгч Анударь Даарьяа нийгэмд сонгодог урлагаар бэлтгэгдсэн төгөлдөр хуурч, трансжендер уран бүтээлч гэдгээр хүлээн зөвшөөрөгдөхөд хялбар байсангүй. ЛГБТ монголчууд ялгаварлан гадуурхалтаас эмээж ажил олгогч, хамтран ажиллагсдаасаа хэн гэдгээ нуудаг байна. 25 настай Даарьяа AFP-д хэлэхдээ тэрбээр урлагийн их сургуульд сурч эхэлснээс хойш эмэгтэй хүн болж олны өмнө амьдарч эхэлсэн бөгөөд оюутнууд өөрөөс нь зайлсхийж, ганц ч найзгүйгээр сургуулиа төгссөн байна.
Тэрбээр "Ирээдүйн уран бүтээлчид, урлагийн багш нар намайг хүлээж авна гэдэгт би гэнэн итгэсэн" хэмээж байв. Даарьяа сургуулиа төгсөөд хэд хэдэн газар ажиллах хүсэлтээ өгсөн байна. Тэрбээр гурван сарын турш Монгол Улсын Консерватороос хариу хүлээсэн бөгөөд холбогдох хүн түүнд "Захиргаанаас чам шиг хүн хүүхэдтэй ажиллах боломжгүй гэж хэлсэн" гэжээ.
Даарьяа өнгөрсөн жилээс хувиараа төгөлдөр хуурын хичээл зааж байгаа бөгөөд бичлэг нь цахим ертөнцөд тарснаар түүний хувь заяа өөрчлөгдсөн. Цахим ертөнцөд олны анхаарлыг татсан нь түүний карьерыг өөрчилсөн бөгөөд Даарьяа одоо хөгжмийн багшаас гадна Монголын загварын брэндүүдэд загвар өмсөгчөөр ажиллаж байна.
Кена нэрээр тоглодог комеди жүжигчин Б.Хулангийн хувьд тайзан дээр гарах нь гадуурхагдсан иргэдийн түүхийг өгүүлэх арга юм. Кена нь хүний эрхийн төлөө тэмцэгч Батхуягийн Золзаяагийн үүсгэн байгуулсан "Big Sistas" төслийн гишүүн юм. Монголын инээдмийн урлагт эрчүүд зонхилдог, сексийн шинжтэй хошигнол ихэвчлэн гардаг “Big Sistas” нь ховор үзэгдэл. Кена тайзан дээр цагаа өнгөрөөж, шинэ жил, санхүүгийн бэрхшээлүүдийн талаар онигоо ярьж, ЛГБТ хүмүүсийн талаар хайр дурлал, сексийн тухай түүхээ хуваалцдаг. Кена Франс Пресс агентлагт "Би өсөж торниж байхдаа аз жаргалтай ЛГБТ хүнийг хэзээ ч харж байгаагүй. Миний үлгэр дуурайлал гэж үздэг байсан хүн бүр ижил хүйстэнтэйгээ харилцах харьцаанаас болж зовж шаналж, хүнд хэцүү амьдрал туулсан” гэжээ.
Хошин урлагийн жүжигчний хувьд Кена "Намайг дагадаг өсвөр насныханд бид аз жаргалтай, амжилттай амьдарч чадна гэдгийг харуулахыг хүсэж байна" гэжээ.
- Хатуу боловч бодит байдал -
Даарьяа, Кена зэрэг жүжигчид ЛГБТ-ын тухай монголчуудад үлгэр дуурайл үзүүлэхэд тусалдаг ч тэдэнтэй адил хүмүүсийн амьдрал бүрхэг хэвээр байна гэж идэвхтэн Цэвээнравдангийн Цогбат Франс Пресс агентлагт ярьжээ. Тэрбээр бэлгийн цөөнхийн эрүүл мэнд, эрхийн төлөө тэмцдэг “Youth Lead Mongolia” байгууллагын захирал юм. Боловсролын орчинд ялгаварлан гадуурхах нь Монголын ЛГБТ өсвөр үеийнхэн, ялангуяа трансжендер залуучуудыг сургуулиа орхих эсвэл эцэг эх нь гэрээсээ хөөхөд хүргэдэг.
Энэ нь тэдний карьерын хэтийн төлөвийг хязгаарлаж, ЛГБТ залуучуудыг түрээсийн мөнгө, хоол хүнсээ төлж чадахгүй цалингийн доод хэмжээний ажилд ороход хүргэдэг.
2022 оны судалгаагаар ЛГБТ хүмүүсийн 27 хувь нь улсын хөдөлмөрийн хөлсний доод хэмжээ болох 420,000 төгрөг (124 ам. доллар)-аас бага цалинтай байжээ.
