УИХ-ын Төсвийн байнгын хорооны өнөөдрийн хуралдаанаар Монгол Улс болон Евразийн эдийн засгийн холбоо, түүний гишүүн орнууд хооронд байгуулах худалдааны түр хэлэлцээрийн төслийг хэлэлцэж байна.

Хэлэлцэж байгаа асуудалтай холбоотойгоор гишүүд асуулт асууж хариулт авч байна. Хэлэлцүүлгийн үеэр байнгын хорооны хуралдааныг хаалттай явуулах саналыг байнгын хороон дарга Ц.Даваасүрэн гаргасан ч гишүүдийн олонх дэмжсэнгүй.

Гишүүд асуулт асууж, хариулт авсны дараа санал хураалт явуулах гэхэд Эрчим хүчний сайд Б.Чойжилсүрэн уг асуудлыг хэлэлцэхийг хойшлуулах санал гаргалаа. Тэрээр "Тийм, үгүй гэдэг шийдвэр өнөөдөр гаргаад яах вэ. Хойшлуулах санал гаргаж байна. Гишүүд байр сууриа нэгтгэг. Шийдвэр гаргахад арай эрт байна" гэсэн юм. Горимын саналаар санал хураалт явуулахад хуралдаанд оролцсон гишүүдийн 52.6 хувь нь дэмжсэнээр уг асуудлыг хэлэлцэхийг хойшлуулав.

УИХ-ын гишүүн Н.Алтанхуяг: Юмны үнийн өсөлтийг дийлэхгүй ядарч зүдэрч явахад нь нөгөө талаас маш өртөг багатай, их хэмжээний бараатай наймаалцах гээд байна. Аж ахуйн эрхлэгчдийн төлөөлөл, салбарын төлөөлөл орж ирээд УИХ-д үг хэлмээр байна. Тэгэхгүй бол Засгийн газар, УИХ-ын гишүүд хоорондоо хэрэлдээд байгаа мэт харагдаад байна. Манайхаас яг юу гаргах юм бэ. Хэдэн сая ам.доллар олж ирэх боломжтой юм. Экспорт нь нэг улстай 90 хувь болчихсон. Энэ 90 хувиа багасаад хэд болох юм бэ. Дэлхийн худалдааны байгууллага манайд бараг хамаагүй. Онол биш тоо яримаар байна.