Төгрөг нуурын ордын хохирогч өнөөдөр АТГ-ын өмнө мэдээлэл өглөө. Тодруулбал, “Төгрөг нуурын энержи” ХХК-ийг 2005 онд үүсгэн байгуулсан Р.Дүгэржав агсны охин өөрт байгаа баримтаа АТГ-т өгч, өөрийгөө хамгаалалтад авахыг хүсэж байгаа талаараа мэдээлэл өглөө.

Түүний аав Р.Дүгэржав агсан Төгрөг нуурын ордыг түшиглэн утаагүй түлшний үйлдвэр байгуулж байсан ч амжилтад хүрээгүй байна. Мөн тус ордын 20 хувийг эзэмшиж байсан ч Хонгконгийн хөрөнгийн бирж дээр зарахдаа тэднээс зөвшөөрөл аваагүй бөгөөд ямар ч мөнгө авч чадаагүй байна. Тиймээс гурван шатны шүүхэд хандсан ч үр дүнд хүрээгүй гэдгийг хэллээ.

Тэрээр “Манай аав гурван жилийн өмнө нас барсан. Манай аавыг 1.3 сая ам.доллароор энэ уурхайг зараад идчихсэн, луйварчин гэж бичиж байна. “Төгрөг нуурын энержи” ХХК-ийг манай аав 2005 онд байгуулж байсан. Манай аав шинжлэх ухааны доктор, профессор, Онц бөгөөд бүрэн эрхт Элчин сайдаар ажиллаж байсан эрдэмтэн хүн. Антарктид тив рүү 7 удаа явж, тэнд газар авч байсан. Манай аав эрүүл чийрэг хүн байсан. Бурхан болоод гурван жил болж байна. Охины хувьд хардаж байна. Би хардах эрхтэй.

Манай аав 2005 онд Төгрөг нуурын орд дээр хэсэг нөхдийн хамт утаагүй түлшний үйлдвэр байгуулаад 2008 онд Ноён Бики гэсэн утаагүй түлшний үйлдвэрийг нээж байсан. Манай аав энэ ордын 20 хувийг эзэмшээд гүйцэтгэх захирлаар ажиллаж байсан. 2009 онд Хонгконгийн хөрөнгийн бирж дээр 250 сая ам.доллароор зарсан. Ингэхдээ 20 хувийг бидний зөвшөөрөлгүй авч, зарсан. 20 хувь дээрээ бидний мөнгийг өг гээд гурван шатны шүүхээр яваад үр дүнд хүрээгүй. 16, 17 жилийн дараа УИХ дээр Төгрөг нуурын ордын асуудлыг гаргаж яриад, улстөржүүлээд байгаад эмзэглэж байна. Иргэн хүнийхээ хувьд өөрт байгаа материалуудаа АТГ-т өгөх нь зүйтэй гэж үзэж байна. Над руу янз бүрийн дугаараас залгаж, мессеж бичиж байна. Айж байна, надад хамгаалалт хэрэгтэй байна.

Би бол АН-ын Үндэсний бодлогын хорооны гишүүн. Тухайн үеийн манай хөрөнгө оруулагч Камикс компанийн захирал Деннис Лим 20 хувийг эзэмшиж байсан. Одоо бурхан болсон. ТУЗ-ийн дарга нь ч бурхан болсон” гэлээ.