УИХ-ын гишүүн Н.Номтойбаяр өнөөдөр /2025.04.03-нд/цаг үеийн асуудлаар мэдээлэл хийлээ.

Тэрээр "Ж.Батзандан гишүүний сонгон хэрэглэж байгаа үг хэллэг, ааш араншин, хүмүүсийг гүтгэж доромжилж байгаа нь Засгийн газрын байр суурь уу эсвэл энэ "золбин" улстөрчийн өөрийнх нь үг үү. Үүнийг ялгаж салгах хэрэгтэй байгаа юм. Энэ хүн чинь Засгийн газрын бүрэн эрхт төлөөлөгч, Засгийн газрыг бүрэн эрхээрээ төлөөлнө гэсэн үг. Энэ асуудлыг Засгийн газраас асууна гэж бодож байна.

Өнгөрсөн хугацаанд Ухаа худагийн асуудалд хэдэн хүнийг бүхий л талаар нь хулгайч, луйварчин, залилагч мэтээр дайрлаа. Үүн дээр би огт санал нийлэхгүй байгаа. Төгрөг нуурын ордын асуудал дээр О.Алтангэрэл сайд гардан ажиллах ёстой. Ухаа худаг битгий хэл одоо яригдаад байгаа Төгрөг нуурын орд дээр маш ноцтой асуудлууд харагдаж байна. Миний харж байгаагаар татвараас зайлсхийх, мөнгө угаах, үндэслэлгүйгээр хөрөнгөжих зэрэг олон шинж тэмдгүүд байгаа. Гэтэл эдгээр асуудлууд огт хөндөгдөөгүй. Хэдэн жилийн өмнө л сонсогдож байсан. Тэр нь сонгуулийн өмнө гарж ирээд буцаад л алга болдог. Л.Оюун-Эрдэнийн Засгийн газар байр сууриа илэрхийлээд, үгийг нь Н.Учрал гишүүн дамжууллаа. Үнэн л юм байна шүү дээ, гаднын компанид 250 сая доллароор "Төгрөг" нуурын ордыг зарцан юм байна.

Дотроо эмээсэн байдалтай ингэвэл яах бол, тэгвэл яах бол гэсэн айдастай гишүүд олон байна. Тэр айдсаасаа гарах хэрэгтэй. Хуулийг эрхэмлээд өргөсөн тангарагтаа үнэнч, зарчмын асуудал дээр зоригтой байгаасай гэж хүсэж байна. Арай л дэндүү хүлцэнгүй байгаа юм.

Манайхан гаднын хөрөнгө оруулагчид гэхээр өвдөг нь сулраад хамаг юмаа барьж гүйгээд, дотоодын хөрөнгө оруулагчдадаа маш дээрэнгүй ханддаг. Энэхүү ялгавартай байдлыг болих хэрэгтэй. Тун удахгүй Хөрөнгө оруулалтын тухай хууль орж ирэх болно. Энэ нь хуучнаараа гадаадын хөрөнгө оруулалтын тухай хууль томьёотой орж ирэх гээд байна. Үүн дээр би эсрэг байр суурьтай байгаа. Яагаад гадаад дотоод гэж хоёр хуваагаад байгаа юм. Эцсийн дүнд ямар ч муу үед хөөрхий хэдэн үндэсний компаниуд хаяж явахгүй байж л байна.

Би ойрын хугацаанд Дорнод аймаг руу явж ажиллах төлөвлөгөөтэй байна. Яагаад гэвэл Дорнод аймагт саяхан л 50 мегаваттын цахилгаан станцын өргөтгөл хийсэн гээд цагаан бээлий өмсөж, улаан тууз хайчлаад байсан. Гэтэл 50 мегаваттын хүчин чадалтай гэх үйлдвэр нь 25 мегаваттаас илүү эрчим хүч үйлдвэрлэж чадахгүй байна. Үйл ажиллагаа техникийн хувьд маш их доголдолтой байна гэж мэргэжлийн хүмүүс нь мэдэгдсэн" гэв.