УИХ-ын гишүүн Э.Батшугар Зээлийн мэдээллийн тухай хуульд нэмэлт, өөрчлөлт оруулах тухай хуулийн төслийг өргөн барьсан. УИХ-ын Эдийн засгийн байнгын хороогоор тус хуулийн төслийг хэлэлцэхийг дэмжсэн юм. Хуульд оруулж байгаа гол өөрчлөлтийн талаар УИХ-ын гишүүн Э.Батшугартай ярилцлаа.

-Та Зээлийн мэдээллийн тухай хуульд нэмэлт, өөрчлөлт оруулах тухай хуулийн төслийг өргөн барьсан. Хуулийн өөрчлөлтөд ямар шинэ зохицуулалтуудыг тусгасан бэ?

-Энэ хуулийг баталбал ямар эерэг нөлөөллүүд гарах вэ гэдгийг эхлээд яръя. Нэгдүгээрт, Монголбанкны хар жагсаалт гэдэг юм байхгүй болно. Өнөөдөр зээлийн мэдээллийн санд 1.6 сая иргэн байгаа. Үүний 200 мянга нь хар жагсаалтад орсон байгаа. Хар жагсаалт гэдэг бол маш харгис санхүүгийн ял байгаа юм. Магадгүй дунд нь зээлээ 7 хоног төлөөгүй байвал энэ зээлийг эргэн төлөөд дууссан ч зургаан жилийн хугацаанд хар жагсаалтад байлгаад байдаг. Энэ бол үнэхээр хоцрогдсон, харгис санхүүгийн систем мөн. Тиймээс үүнийг болиулаад онооны системд оруулъя гэж байгаа юм. Онооны системд орсноор хар жагсаалт гэдэг зүйл байхгүй болж мөн зээлийн хүү нийтээрээ буурах нөхцөл бүрдэнэ. Бүхий л улс орнуудын судалгааг харахад ийм нөлөө үзүүлсэн байна. Тодруулбал, би 28 орны судалгааг харахад зээлийн онооны системтэй болсны дараа 3.4-3.6 хувиар зээлийн хүү буурсан байна. Учир нь нэгд, бусад санхүүгийн байгууллагуудтай өрсөлдөх нөлөөг нь арилгаж байна гэсэн үг. Өнөөдөр иргэн ямар нэгэн банкны харилцагч болоход банкууд дотооддоо үнэлгээний системтэй байдаг. Тэр системээ гадагшаагаа задалдаггүй. Тэгэхээр тухайн банкны нөхцөлөөр л иргэд санхүүгийн үйлчилгээ авч байгаа. Онооны системтэй болчихвол энэ нь бусад банк, санхүүгийн байгууллагад оноогоо үзүүлээд үйлчилгээ авч болно. Хоёрт, банкны зардал буурна. Банкны нийт зардлын 63 хувь нь эх үүсвэрийн зардал байна. Энэ нь хадгаламжийн хүү гэж ойлгож болно. 15 хувь нь эрсдэлийн зардал, 22 хувь үйл ажиллагааны зардал. Онооны системтэй болсноор эрсдэл болон үйл ажиллагааны зардлаас хэмнэлт хийж болно. Учир нь тухайн иргэний эрсдэл ойлгомжтой байхаас гадна зээл олгохдоо эдийн засагч нар судалгаа хийгээд цаг зарцуулахгүй оноог нь хараад зээлээ өгч болно. 7 хоногт зээл олгодог процесс 0.6 өдөрт гэж байгаа юм. Нэг үгээр тал өдөрт зээл гаргадаг болно. Тухайн иргэнд судалгаа хийхгүй зээлийн оноог үндэслээд зээл олгоно гэсэн үг. Иргэний тухайд миний зээлийн оноо бол биет бус санхүүгийн хөрөнгө гэж ойлгож болно. Тэгэхээр илүү сахилга баттай болно.