Улсын Их Хурал 2024-2028 оны стратеги төлөвлөгөөндөө “Хүн төвт” бодлогыг эрхэмлэж, хүний эрх, эрх чөлөөг дээдэлсэн эрх зүйн орчинг бүрдүүлэхээр тусгасан. Энэ хүрээнд Улсын Их Хурлын гишүүн Д.Цогтбаатар нарын 9 гишүүн 2025 оны 01-р сарын 23-ны өдөр Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг өргөн мэдүүлээд байна.

Уг хуулийн төслүүдийг хэлэлцэх эсэхийг УИХ-ын Хууль зүйн байнгын хорооны өнөөдрийн хуралдаанаар хэлэлцэж, дэмжлээ.

“Хуулиудын хууль” гэгддэг Хууль тогтоомжийн тухай хуулийн дагуу аливаа хуулийн төслийг боловсруулах, өргөн барих, парламентын шалгуурыг давах зохицуулалттай байдаг. Уг шалгуур, үзүүлэлтийг илүү нарийвчилж, УИХ-д өргөн барьж, хэлэлцэх бүх хууль тогтоомжийн төсөлд хүний эрхийн дүн шинжилгээ хийдэг болох тухай шинэ хуулийн төсөлд тусгажээ. Өөрөөр хэлбэл, хүний эрхийн чиглэлээр үйл ажиллагаа явуулж буй хууль, хяналтын байгууллагууд, ХЭҮК-ын дүгнэлтэд үндэслэн шалгуурыг давах босго тогтоох юм байна.

Ийнхүү хуулийн төсөл бүрд хүний эрхийн дүн шинжилгээ хийдэг болсноор “Хүн төвт” эрх зүйн орчин бүрдэхэд чухал нөлөөтэй хэмээн хууль тогтоогчид үзлээ. Түүнчлэн хуулийн төсөлд тавигдах шалгуур үзүүлэлтэд судалгааны үр дүнг чухалчилж, УИХ-ын дэргэдэх судалгааны хүрээлэнгийн чадавхыг нэмэгдүүлнэ гэв. Хуулиас давсан журмууд хүнд суртал дарамтыг үүсгэж, хүний эрхэд халдаж байгааг ч онцолсон. Тиймээс журмуудыг цэгцэлнэ. Хүний суурь эрхүүдийг зөвхөн хуулиар зохицуулах ёстойг хуулийн төслийн үзэл баримтлалд тусгажээ.