Засгийн газар томоохон төслүүдэд хөрөнгө оруулалт татаж, яриа хэлэлцээг ахиулах зорилгоор Монгол Улсын Үндэсний аюулгүй байдлын зөвлөлд ажиллаж байсан хүмүүсийг Тусгай үүрэг гүйцэтгэгч Элчин сайдаар томилохоо мэдэгдсэн. Тэгвэл тусгай үүрэгт Элчин сайдууд эхнээсээ ажилдаа оржээ. Тодруулбал, ОХУ-аас БНХАУ руу Монгол Улсын нутаг дэвсгэрээр дамжуулан байгалийн хий дамжуулах хийн хоолойн төсөл буюу "Сибирийн хүч 2" төслийг хариуцах ажиллах Монголын Засгийн газрын тусгай үүрэг гүйцэтгэгч Элчин сайд З.Энхболд ажилдаа орж, өнөөдрийн Засгийн газрын хуралдаанаар тодорхой үүрэг чиглэл авчээ. 2025 ондоо багтаан Монгол Улсын нутаг дэвсгэрээр дамжуулан ОХУ-аас БНХАУ-руу байгалийн хий нийлүүлэх хоолой барих төслийн байгаль орчинд нөлөөлөх байдлын үнэлгээ хийх ажлыг гүйцэтгэхээр төлөвлөжээ. 

Байгалийн хий хоолой дамжуулах төслийн гол захиалагч болох БНХАУ-ын зүгээс уг төслийг хэрэгжүүлэх эсэх дээр эцсийн шийдвэрээ хэлээгүй, яриа хэлэлцээний түвшинд үргэлжилж буй. Харин ОХУ болон Монгол Улсын зүгээс нэлээдгүй хүчин чармайлт гарган ажиллаж байгаа. Тухайлбал:

• Монгол Улсын зүгээс уг төслийг хариуцсан ажиллах нэгжийг 2021 онд "Эрдэнэс Монгол" нэгдлийн дэргэд байгуулсан. Улмаар ОХУ-аас БНХАУ-руу байгалийн хий нийлүүлэх хоолой барих төслийн ТЭЗҮ-ийг боловсруулах ажлыг “Эрдэнэс газ” төслийн нэгж болон ОХУ-ын “Газпром” ХНН-ийн “Газопровод союз восток” ХХК-тай хамтран 2021 оны 12 дугаар сарын 15-ны өдөр бүрэн дуусгав.
• Төслийн техник, эдийн засгийн үндэслэлийг 2022 оны нэгдүгээр сард батлуулж, инженерийн хайгуул судалгааны ажлуудыг мөн онд гүйцэтгэж, нарийвчилсан зураг төслийн баримт бичгүүдэд магадлал хийх ажлыг 2024 онд дуусгаж, шаардлагатай газрыг улсын тусгай хэрэгцээнд авах зэрэг ажлыг хийж гүйцэтгээд байгаа аж.
• Монголын талаас уг төслийн Ажлын хэсгийг Шадар сайд С.Амарсайхан ахалж буй. Мөн Монгол Улсын Тусгай үүрэг гүйцэтгэгч элчин сайд З.Энхболд, “Эрдэнэс Монгол” ХХК-ийн “Эрдэнэс газ” төслийн удирдагч Д.Даваа нар голлох үүрэгтэй ажиллаж байгаа аж.
• Байгалийн хий дамжуулах хоолой нь хойд хилээс урд хил хүртэл 958,6 км үргэлжилж, зургаан аймаг, 22 сумын нутгаар дайран өнгөрөх бөгөөд газар доогуур тавигдах юм байна. ТЭЗҮ-ийн дагуу төсөл нь техникийн талаас хэрэгжих бүрэн боломжтой, эдийн засгийн үр өгөөжтэй, байгаль орчинд сөрөг нөлөө үзүүлэхгүй гэсэн урьдчилсан дүгнэлт гарсан байна.
• Монголын талаас уг төсөл хэрэгжсэнээр гадаадын шууд хөрөнгө оруулалтын хэмжээ нэмэгдэж эдийн засаг тэлнэ гэж үзжээ. Барилга угсралтын үед 12 000, ашиглалтын үед 1000 гаруй ажлын байр бий болно.
• Байгалийн хий нь эрчим хүчний хямд эх үүсвэр бөгөөд байгалийн хийгээр ажилладаг дулаан, цахилгааны станцууд барьж байгуулснаар эрчим хүчний системийн маневрлах чадварыг нэмэгдүүлж, эрчим хүчний системийн тогтворжилт дээшилнэ. Түүнчлэн зураг төслийн баримт бичигт Дархан, Улаанбаатар, Чойр, Сайншанд руу байгалийн хий авах гаргалгааг тусгаж өгсөн учир дотооддоо байгалийн хий авч ашиглан агаарын бохирдлын асуудлыг бүрэн шийдвэрлэх боломжтой үзжээ.

Байгалийн хийн хоолой төслийг урагшлуулах, талуудтай нааштай яриа хэлэлцээ хийх үүрэгтэй ажиллах Тусгай үүрэг гүйцэтгэгч Элчин сайд З.Энхболд саяхан Моксва хотноо ажиллаж, ОХУ-ын Эрчим хүчний сайдтай уулзалт хийж, санал солилцоод ирсэн. Гэхдээ уг төсөл хөдлөх, эсэх нь ОХУ гэхээс илүүтэй гол худалдан авагч болох БНХАУ-ын бодлогоос ихээхэн хамааралтай байгаа юм. Төслийг хөдөлгөх, талуудын ижил тэгш харилцааг хангах хүрээнд БНХАУ-ын талтай яриа хэлэлцээ хийж таарна гэсэн үг. Тэгэхээр Тусгай үүрэг гүйцэтгэгч Элчин сайд З.Энхболд ганц Оросыг бараадсанаар асуудал шийдэгдэхгүй гэдгийг сануулахад илүүдэхгүй биз.

Тусгай үүрэг гүйцэтгэгч Элчин сайдын үүргийг Гадаад харилцааны сайд Б.Батцэцэг "Дотооддоо гадаад харилцаатай холбоотой тодорхой асуудал, сэвдийг хариуцаж ажилладаг. Тухайн асуудал нь шийдэгдвэл албан тушаалаасаа бууж, больчихдог албан тушаал. Хариуцсан асуудлаараа Монгол Улсын Засгийн газрыг, эсвэл Гадаад харилцааны яамыг төлөөлж гаднын улс орнуудтай яриа хэлэлцээ хийж болдог" гэж тодотгосон. Тэгэхээр Тусгай үүрэг гүйцэтгэгч Элчин сайд З.Энхболд хийн хоолойн төсөл шийдэгдтэл эл албан тушаалаас буухгүй бололтой.