Хөгжлийн банкны удирдлагын багаас мэргэжлийнхэн шахагдаж, намчдаар дүүрчээХөгжлийн банкны удирдлагын багаас мэргэжлийнхэн шахагдаж, намчдаар дүүрчээ
Нийтэлсэн 2025 оны 4 сарын 1
Хамтарсан Засгийн газрын халаа сэлгээ одоо хүртэл дуусаагүй байна. Одоог хүртэл гэсний учир нь Засгийн газар бүрдээд хэдийнэ найман сар болж байгаа ч төрийн албан дахь бужигнаан үргэлжилсээр. Сүүлд төрийн өмчит компани, банк, улсын үйлдвэрийн газруудад “хяналтын менежер”, "бүтээмжийн менежер” гэсэн албан тушаалыг шинээр бий болгож, эл албан тушаалд хэнийг томилох вэ гэдэг бялуу хуваалт МАН, АН-д ид өрнөж байна. Төрийн албанд хийгдэж буй халаа сэлгээг сүүлд Хөгжлийн банкин дээр хийсэн томилгоогоор жишээлэн танилцуулъя.
Үндсэндээ Хөгжлийн банкийг АН-д өгчээ. Өмнө нь Хөгжлийн банк Сангийн яаманд харьяалагддаг байсан бол Хамтарсан Засгийн газар байгуулагдсаны дараа Эдийн засаг, хөгжлийн яаманд хариуцуулсан. Энэ хүрээнд Эдийн засаг, хөгжлийн сайд Л.Гантөмөр Хөгжлийн банкны Гүйцэтгэх захирлаар З.Нарантуяаг томилсноос эхлээд удирдлагын багийн ихэнхийг нь намынхнаараа дүүргэжээ. Мэдээж АН-ынхан засагт хамтарч байгаа учраас албан тушаалын хуваарилалтад оролцох нь зүйн хэрэг. Гэхдээ дөнгөж өндийж байгаа Хөгжлийн банкийг ажлын туршлагагүй намчдаар удирдуулсан нь эрсдэл дагуулж мэдэхээр байна.
2025 он гарсаар Хөгжлийн банкны удирдлагын багт долоон захирлыг шинээр томилжээ. Нэг хүнийг эс тооцвол бүгд намчид бөгөөд өнгөрсөн сонгуулиар намдаа өгсөн хандивынхаа шагналыг хүртэж, албан тушаалд хуваарилагдсан хүмүүс бололтой. Тэдний дөрөв нь 2024 оны УИХ-ын сонгуульд АН-аас нэр дэвшээд сонгогдож чадаагүй хүмүүс байна.
Хөгжлийн банкны Тэргүүн дэд захирал Х.Эрдэнэбаатар
Энэ мэдээнд өгөх таны сэтгэгдэл ?
Хөгжлийн банкны Тэргүүн дэд захирал нь төслийн санхүүжилт, бизнес хөгжил, хөрөнгө оруулалт хариуцсан газруудын үйл ажиллагаанд хяналт тавьж, удирдан чиглүүлэх үүрэгтэй ажилладаг байна. Энэ албыг Хаш-Эрдэнийн Эрдэнэбаатарт хариуцуулжээ. Х.Эрдэнэбаатар нь өнгөрсөн 2024 оны УИХ-ын сонгуульд Хөвсгөл, Орхон, Булган аймгийн IV тойрогт АН-аас нэр дэвшээд сонгогдож чадаагүй. Түүнийг экс Ерөнхийлөгч Х.Баттулгын хүн гэх яриа сонгуулийн үеэр нэлээд явсан. Түүний хувьд төрийн алба болон банкны салбарт ажилласан туршлага тун хомс. Харин хувийн банк бус санхүүгийн байгууллагатай нэгэн аж.
Стратеги төлөвлөлт, бизнес хөгжүүлэлтийн газрын захирал Л.Болормаа
Тус газрын захирал нь Маркетинг, олон нийттэй харилцах хэлтэс, Зах зээлийн судалгаа, төслийн хөгжүүлэлтийн хэлтэс, стратеги төлөвлөлт, бодлогын хэлтсийг удирдан чиглүүлж ажиллана. Энэ албыг Лхагваагийн Болормаа хариуцан ажиллахаар томилогджээ. Л.Болормаа нь 2024 оны УИХ-ын сонгуульд АН-ын жагсаалтын 30-д эрэмбэлэгдсэн бөгөөд Говь-Алтай аймгийн Засаг даргын Тамгын газар, аймгийн ИТХ-д 2001-2018 он хүртэл ажиллаж байжээ. Тэрээр 2018-2025 онд АН-ын Нийгмийн дэвшил эмэгтэйчүүд хөдөлгөөн ТББ-ын Ажлын албаны даргаар ажиллаж байгаад Хөгжлийн банкны газрын захирлаар томилогдсон байна. Банк, санхүүгийн байгууллагад ажиллаж байсан туршлагагүй аж.
Хяналтын менежер буюу Санхүү удирдлагын газрын захирал Д.Аюурзана
Хөгжлийн банкны санхүү удирдлагын захирал нь хяналтын менежерийн үүргийг давхар гүйцэтгэж байгаа бөгөөд санхүүгийн төлөвлөлт, хяналт, тайлан бүртгэл, хөрөнгийн зохицуулалтыг удирдаж ажиллах үүрэгтэй аж. Энэ албыг 2024 оны сүүлээс Даваагийн Аюурзана гэх эмэгтэй хариуцан ажиллахаар болсон байна. Д.Аюурзана нь нягтлан бодогч, аудитор мэргэжилтэй, 2019-2020 онд Хөгжлийн банкны охин компани "Ди Би Эм лизинг” ХХК-д Ерөнхий нягтлан бодогчоор ажиллаж байсан. Мөн 2023-2024 онд “Тавантолгой төмөр зам” ХХК-д ахлах нягтлан бодогчоор ажиллаж байгаад Хөгжлийн банкны Санхүүгийн удирдлагын захирлаар томилогджээ.
Тэрээр УИХ-ын гишүүн Д.Цогтбаатарын төрсөн эгч юм байна. Д.Цогтбаатар нь 2016-2020 онд Хөгжлийн банкны Зээлийн хэлтсийн газрын захирлаар ажиллаж байхдаа албан тушаалын байдлаа урвуулан ашигласан гэмт хэрэгт гэм буруутай нь тогтоогдож, шүүхээс ял шийтгэл аваад байгаа билээ. Д.Цогтбаатарыг Хөгжлийн банкинд зээлийн хэлтсийн даргаар ажиллаж байхад эгч Д.Аюурзана нь Хөгжлийн банкны охин компанид Ерөнхий нягтлан бодогчоор ажиллаж байсан болж таарав.
Захиргаа удирдлагын газрын захирал Н.Гансүх
Захиргаа, удирдлагын газар нь Хөгжлийн банкны хүний нөөц болон дотоод үйл ажиллагааг хариуцан ажилладаг байна. Тус газрыг Норовсамбуугийн Гансүх хариуцан ажиллахаар томилогджээ. Н.Гансүх нь АН-ын дарга Л.Гантөмөрийн зөвлөхөөр ажиллаж байгаад 2024 оны НИТХ-ын сонгуульд АН-аас нэр дэвшсэн ч сонгогдож чадаагүй юм. Түүний хувьд төрийн албанд удаан,тогтвортой ажилласан туршлага тун ховор аж.
Эрсдэлийн удирдлагын газрын захирал Д.Басбиш
Хөгжлийн банкны Эрсдэлийн удирдлагын газар нь эрсдэлийн бодлого, хяналтыг хэрэгжүүлж ажиллах үүрэгтэй юм байна. Энэ газрын захирлаар Дунайн Басбишийг томилсон. Түүний хувьд эдийн засагч мэргэжилтэй, Кредит банк, Энержи ресурс болон хэд хэдэн ББСБ-д ажиллаж байсан аж. 2012-2016 онд АН засаг барьж байхад Гадаад харилцааны яаманд ажиллаж байжээ. Мөн 2020 оны НИТХ-ын 11-р тойрог Сонгионохайрхан дүүрэгт нэр дэвшиж байсан байна.
Хөрөнгийн зохицуулалтын газрын захирлаар Э.Наранбаяр
Мөн 2025 он гарсаар Хөгжлийн банкны Хөрөнгийн зохицуулалтын газрын захирлаар Эрдэнэбатын Наранбаярыг томилсон. Энэ нь ганц мэргэжлийн гэж болох томилгоо харагдаж байна. Э.Нарбаярын хувьд банк санхүүгийн байгууллагад 2010 оноос хойш ажилласан туршлагатай, 2020-2024 онд Худалдаа хөгжлийн банкинд салбарын захирлаар ажиллаж байгаад Хөгжлийн банкинд томилогджээ.
Бүтээмжийн менежер Ж.Мөнхжаргал
МАН-аас Хөгжлийн банкинд бүтээмжийн менежерээр Ж.Мөнхжаргалыг томилсон. Бүтээмжийн менежер нь Захиргаа удирдлагын газр, Мэдээллийн технологи, цахимжуулалтын газрыг хариуцан ажиллах юм байна.
Хөгжлийн банкны хуучин захирлуудаас Төслийн санхүүжилтийн газрын захирал Б.Сайнзаяа, Хөрөнгө оруулалтын газрын захирал Л.Тэмүүжин нар үргэлжлүүлэн ажиллаж байгаа ч тун удахгүй ажлаа хүлээлгэн өгч магадгүй гэдгийг эх сурвалж мэдээлэв. Хөгжлийн банк он гарсаар бүтэц бүрэлдэхүүндээ өөрчлөлт оруулж, 120 гаруй байсан орон тоогоо 135 болгон нэмэгдүүлсэн ч ихэнх нь намын тодотголтой хүмүүсээр дүүрч, олон жил ажилласан мэргэжлийнхнийг "гэрээт ажилтан" нэрээр шахаж байгаа аж.
Энэ мэт удирдлагын багаа намчдаар бүрдүүлсэн Хөгжлийн банк 1.5-2 тэрбум ам.долларын бонд босгох ажилдаа орсон бөгөөд андрайтераар ажиллах компаниа сонгож, хөрөнгө оруулагчдад саналаа хүргүүлээд байгаа юм. Өмнө нь намчид, намын тавиулууд Хөгжлийн банкны эх үүсвэрээр хэрхэн найрласныг бүгд харсан, шүүсэн. Өнөөдөр ч тэр балаг нь бүрэн арилаагүй, 1.7 их наяд төгрөгийн чанаргүй зээлийн үлдэгдэлтэй яваа. Цаашдаа Хөгжлийн банкны ирээдүй яах бол...
