Улсын хэмжээнд гуравдугаар сарын 29-ний байдлаар менингококкт халдварын батлагдсан дөрвөн тохиолдол (УБ-3, АР-1) бүртгэгдэж, 2 хүүхэд нь нас баржээ. Насны хувьд 3-5 хүртэлх насны хүүхдүүд байна. Өнөөдрийн байдлаар эмнэлэгт эмчлэгдэж буй тохиолдол байхгүй.

ХӨСҮТ-ийн ерөнхий захирал Г.Анхбаяр: “Сэлэнгэ аймгийн Мандал суманд менингококкт халдвараар өвдсөн хүүхэд нас барсан гэдэг нь одоогоор тус халдвараар өвдөж эндсэн гэдэг нь батлагдаагүй бөгөөд лабораторын шинжилгээ хийгдэж байна. Өөрөөр хэлбэл, ХӨСҮТ-д сэжигтэй тохиолдлоор бүртгэгдсэн бөгөөд задлан шинжилгээгээр эцсийн хариу гарна.

Улсын хэмжээнд менигококкт халдварын эсрэг 2000 тун вакцин татан авч хавьтлуудын ойрын хүрээллийг дархлаажуулж байна. Менингококкт халдварын вакцин товлолт бус тархвар зүйн вакцин буюу халдвар гарсан үед хийгддэг вакцин юм. 

Сүүлийн 10 жилийн хөдлөл зүйгээс харахад жилд дунджаар энэхүү халдварын ойролцоогоор 8 тохиолдол, 2 нас баралт бүртгэгддэг үзүүлэлттэй байна. Менингококкт халдварын тохиолдол бүх насныханд бүртгэгдэж байгаа ч нийт өвчлөлийн 80-85 орчим хувь нь 0-4 настай хүүхдийн өвчлөл эзэлж, нийгмийн байдлаар авч үзэхэд нийт өвчлөгсдийн 77 хувь нь гэртээ, 15 хувь цэцэрлэгт, 8 хувь нь сургуульд хамрагддаг хүүхдүүд байна. Өвчлөл 2- 4 дүгээр саруудад харьцангуй өндөр бүртгэгддэг зүй тогтол ажиглагдаж байна. Мөн нас барсан тохиолдолд хийсэн судалгаагаар эрүүл мэндийн байгууллагад 60-70 хувь нь 24 цагаас дээш болсон хугацааны дараа буюу оройтож хандаж байгаа шалтгаан голлож байна.