УИХ-ын мягмар, лхагва гарагт байнгын хороод хуралддаг. Тэгвэл өнөөдөр УИХ-ын Хууль зүйн байнгын хороог хуралдуулахаар товлосон бөгөөд тус хуралдаанд Хууль зүй дотоод хэргийн сайд О.Алтангэрэл Ноорог медиатай холбоотой асуудлаар мэдээлэл хийх юм байна.

Хууль зүй дотоод хэргийн сайд О.Алтангэрэл Ноорог медиатай холбоотой асуудлаар хоёр, гурван удаа мэдээлэл хийж, бүр телевизийн нэвтрүүлэгт хүртэл орсон юм. Тэгвэл тэрээр өнөөдөр УИХ-д танилцуулахаар болжээ.

Тодруулбал, өнөөдрийн Хууль зүйн байнгын хорооны хуралдаанаар дараах асуудлыг хэлэлцэнэ.

• Сүүлийн өдрүүдэд үүсээд байгаа хэвлэн нийтлэх эрх чөлөөнд халдсан байж болзошгүй гэж үзэж байгаа асуудлын талаар Хууль зүй, дотоод хэргийн сайдын мэдээллийг сонсох
• Монгол Улсын Үндсэн хуулийн цэцийн 2025 оны 02 дугаар дүгнэлт /Монгол Улсын шүүхийн тухай хуулийн 47 дугаар зүйлийн 47.6 дахь хэсгийн холбогдох зохицуулалт Монгол Улсын Үндсэн хуулийг зөрчсөн эсэх/
• Монгол Улсын Үндсэн хуулийн цэцийн 2025 оны 03 дугаар дүгнэлт /Монгол Улсын Их Хурлын сонгуулийн тухай хуулийн зарим хэсэг Монгол Улсын Үндсэн хуулийг зөрчсөн эсэх/
•  Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн өргөн мэдүүлсэн хууль, тогтоолын төслүүд /Улсын Их Хурлын гишүүн Д.Цогтбаатар нарын 9 гишүүн 2025.01.23-ны өдөр өргөн мэдүүлсэн, хэлэлцэх эсэх/
• Хүний эрх, эрх чөлөөг хангахтай холбоотой зарим хуульд нэмэлт, өөрчлөлт оруулах тухай хуулийн төсөл /Засгийн газар 2025.01.24-ний өдөр өргөн мэдүүлсэн, хэлэлцэх эсэх/
•  Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл /Засгийн газар 2024.12.27-ны өдөр өргөн мэдүүлсэн, хэлэлцэх эсэх/