Ноорог фэйжийн ажилтан А.О-н ар гэрээс олон нийтийн цахим сүлжээгээр дамжуулан хийсэн мэдээлэлтэй холбоотойгоор Цагдаагийн ерөнхий газраас мэдээлэл хийлээ.

Цагдаагийн байгууллагаас сүүлийн дөрвөн жилд мөрийтэй тоглоом зохион байгуулахтай холбоотой нийт 1360 хэрэгт мөрдөн шалгах ажиллагаа явуулж, 365 хэрэгт эрүүгийн хэрэг үүсгэн прокурорт шилжүүлжээ. 299 хэргийг шүүхээр эцэслэн шийджээ.

Адъяабазар Баяржавхлан гэсэн фэйсбүүк хаягаас цагдаагийн алба хаагчтай холбоотой ноцтой мэдээлэл хийсний дагуу ЦЕГ-ын Дотоод хяналт, аюулгүй байдлын газраас ажлын хэсэг гарган, дотоод хяналт шалгалтыг эхлүүлжээ. Эхний ээлжид Хянамгай бай хэвлэлийн бага хурлын үеэр өгсөн мэдээллийг Цагдаагийн байгууллагын шуурхай хуралдаанаас өгсөн мэтээр ярьсан нь тогтоогдсон гэлээ. Өчигдөр орой олон нийтийн сүлжээнд мэдээлэл хийсэн иргэн Баяржавхлан гадаад улсад байгаа учраас интерполын шугамаар эрэн сурвалжилж, Монгол Улсад албадан авчрах ажлыг хийх аж.

ЦЕГ-ын Кибер гэмт хэрэгтэй тэмцэх газрын дарга, хурандаа С.Тайван: Мөрийтэй тоглоом зохион байгуулах гэмт хэрэг зохион байгуулалтай, олон хүний оролцоотой үйлдэгддэг. Монгол Улсын иргэд сүүлийн жилүүдэд гадаад улсаас энэ төрлийн гэмт хэргийг үйлдэх болсон. Тухайлбал, Монгол Улсын иргэн Н,Т-гийн бүлэглэл буюу 35 хүнтэй бүлэглэл байгаа. Энэ бүлэглэл гадаад улсаас гэмт хэрэг үйлдэж байхад нь цагдаагийн байгууллага Шувуу ажиллагааны хүрээнд албадан баривчилж авчирсан.

Мөн 28 хүний бүрэлдэхүүнтэй Г-гийн бүлэглэл гэж байна. Энэ бүлэгтэй холбоотой хэрэгт мөрдөн шалгах ажиллагаа явуулаад хоёр этгээд нь цагдан хоригдоод шалгагдаж байна.

Б-гийн бүлэглэл өчигдөр орой мэдээлэл хийсэн Баяржавхлан гэдэг хүний хамаарал бүхий 18 хүн оролцсон бүлэглэл байгаа. Энэ бүлэг мөн гадаад улсаас гэмт хэрэг үйлдэж байгаа нь өчигдрийн мэдээллээс тогтоогдож байна. Мөрийтэй тоглоомын гэмт хэрэг маш олон иргэнийг хохироодог, санхүүгийн тогтвортой байдлыг бий болгож, амиа хорлоход хүргэдэг ноцтой гэмт хэрэг. Цагдаагийн байгууллага сүүлийн жилүүдэд Хяналт-1, Хяналт-2, Хар сүлжээ гэх мэт арга хэмжээг авч ажиллаж байна. Өчигдөр орой олон нийтийн мэдээллийн хэрэгслээр мэдээлэл хийсэн иргэний төрсөн хоёр дүү О, Б нар нь шүүгчийн захирамжаар цагдан хоригдсон. Энэ этгээдүүд мөрийтэй тоглоом зохион байгуулах, гэмт бүлэг үүсгэх, мөнгө угаах гэмт хэрэгт буруутгагдан шалгагдаж байгаа.

Гэмт бүлэг байгуулах гэдэг зүйл анги нь Эрүүгийн хуулийн 3.8.1-р “зүйлд зохион байгуулалттай гэмт бүлэг гэж гэмт хэрэг байнга үйлдэж, ашиг олох зорилгоор урьдчилан нэгдсэн гурав ба түүнээс дээш хүнтэй тогтвортой нэгдлийг хэлнэ” гэж заасан. Цагдаагийн байгууллага 2023 оноос хой Торгоны зам нэртэй мөрийтэй тоглоомтой холбоотой 10 иргэний 5 данс, Хос тамга нэртэй 11 иргэний 20 дансанд хязгаарлалт тогтоож ажилласан. Тухайн хэрэгтэй холбоотой гурван хүнийг цагдан хорьсон. Нэг хүн нь Б гэх иргэн байгаа. Энэ хүн 2010-2019 онд цагдаагийн байгууллагад ажиллаж байсан иргэн. Тухайн гэмт хэрэгт буруутгагдан цагдан хоригдсон" гэлээ.