ЦЕГ-ын Эрүүгийн цагдаагийн албаны Кибер гэмт хэрэгтэй тэмцэх газраас “Ноорог креатив студио” ХХК-ийн 8 ажилтныг гуравдугаар сарын 17-18 шилжих шөнө хойшлуулшгүйгээр баривчилж, ажлын байран дээр нь нэгжлэг хийж, цахим төхөөрөмжүүдийг нь хураан авч, тэдний халдашгүй эрхтэй байх, үзэл бодлоо илэрхийлэх эрх чөлөөг зөрчсөн байх болзошгүй гэх мэдээлэл олон нийтийн сүлжээнд нийтлэгдсэн.

Тэгвэл “Ноорог креатив студио” ХХК-д холбогдох хэргийн талаар Хүний эрхийн Үндэсний Комиссоос дараах гурван дүгнэлтийг танилцууллаа.

1. “Ноорог креатив студио” ХХК-ийн 8 ажилтны халдашгүй чөлөөтэй байх эрхийг зөрчсөн.

2. Тухайн 8 иргэний үзэл бодлоо илэрхийлэх эрх чөлөөг хөндөж, Монгол Улсын иргэд үзэл бодлоо чөлөөтэй илэрхийлэх эрмэлзэл, зоригийг мохоох үр дагавар үүсгэсэн үйл явдал болсон.

3. Төрийн эрх бүхий байгууллагууд болсон үйл явдлын талаар мэдээлэхдээ олон нийтийн мэдээлэл авах эрхийг хангаагүй.

Тухайн 8 иргэний хоёр нь Эрүүгийн хуулийн 10.4 дүгээр зүйлийн нэг дэх хэсэгт зааснаар 2024 оны есдүгээр сарын 26-ны өдрийн дугаартай хэрэг бүртгэлийн хэрэг, Эрүүгийн хуулийн 20.17 дугаар зүйл мөрийтэй тоглоом зохион байгуулах хэргүүдэд хэрэг бүртгэлийн хэрэг шалгагдаж байгаа. Гэхдээ үүнийг хойшлуулшгүй ажиллагаатай шууд хамааралгүй гэж үзсэн байна.