Наурызын баяр болох гэж буйтай холбоотойгоор Баян-Өлгий аймгийнхны итгэлийн оч болж нутгийнхаа найм дахь улсын цолтон болсон Б.Серик зааны онцлох 8 баримтыг хүргэж байна. Б.Серик зааныг жудагтай бөх гэж зон олон хүндэлдэг. Унавал тахимаа түргэн өгдөг, үүний сацуу үргэлжид инээмсэглэн алхах нь олны сэтгэлийг дулаацуулдаг биз ээ.

1. Тэрээр 1994 оны дөрөвдүгээр сарын 30-ны өдөр Баян-Өлгий аймгийн Улаанхус суманд төрж, Дархан-Уул аймгийн Шарын гол суманд өсжээ.
2. 2008 оноос жүдо бөхөөр Ц.Шийрэв багшийн удирдлага дор бэлтгэлээ эхэлж бөхийн замналаа эхлүүлсэн.
3. Үндэсний бөхөөр 2011 онд аймгийн заан, 2013 онд аймгийн арслан, 2017 онд улсын начин, 2022 онд улсын заан цол хүртсэн.
4. Тэрээр  Баян-Өлгий аймгийн О.Бахыт харцагаас хойш 76 жилийн дараа Монгол Улсын заан цол хүртсэн. Ингэхдээ нэгийн даваанд сумын заан Э.Дашзэвэг, хоёрын даваанд аймгийн харцага Б.Өлзийсайхан, гурвын даваанд аймгийн арслан Ш.Чинтулга, дөрвийн даваанд аймгийн арслан П.Даваадорж, тавын даваанд аймгийн арслан Ц.Төмөрцоож, зургаагийн даваанд аймгийн арслан Э. Сумьяабат, долоогийн даваанд улсын заан Д.Анарыг давсан.
5. Б. Серик нь жүдо, чөлөөт, казак курес, самбо, сүмо бөх гээд олон төрлөөр барилдаж байсан. Барилдаад 17 жил болж байгаа. Түүний хөдөлмөрийг төр үнэлж 2024 онд Хөдөлмөрийн гавьяаны улаан тугийн одонгоор шагнасан.
6. Б.Серик самбо бөхийн УАШТ-д 2017, 2019, 2020 онуудад түрүүлж, 2018 онд мөнгөн медаль хүртсэн. Түүнчлэн самбо бөхийн өсвөр үе, залуучуудын ДАШТ-ээс хүрэл медальтай. 2019 онд Насанд хүрэгчдийн ДАШТ-д анх удаа оролцоод мөн хүрэл медаль хүртэж байв. Түүнээс гадна 2024 онд казах курес бөхийн Азийн цомын тэмцээнээс хүрэл медаль хүртсэн.
7. Бүжиглэдэг заан”, “Хамгийн гоё инээмсэглэдэг бөх” гээд бөх сонирхогчдын хайр хүндлэлийг хүлээдэг хүн бол Улсын заан Бердимуратын Серик. Тэрээр хамгийн олон дэмжигчтэй бөхөд зүй ёсоор тооцогддог. Түүнийг бөх сонирхогчид “Сийрэгхэн барилдаантай Б.Серик заан” хэмээн барилдааныг нь үзэх дуртай байдаг.
8. Тэрээр манай сайтад өгсөн ярилцлагадаа “Төрийн наадамд цолоо ахиулж, ард түмнээ цэнгүүлэхийн төлөө хичээнэ” гэдгийг онцолж байсан билээ.