Монгол Улсын саалийн ганц үнээ "Эрдэнэт үйлдвэр" байсан бол одоо "Эрдэнэс Тавантолгой" ХК болоод удаж буй. Монгол Улсад хэрэгжүүлж байгаа бүх л том төслүүдийг санхүүжүүлэхээс гадна нийслэлийн гэр хорооллын айл өрхүүдийн түлшний татаасыг тус компани санхүүжүүлсээр ирсэн. Цаашдаа 2027 он хүртэл санхүүжүүлэх үүргийг Засгийн газраас өгөөд байгаа.

Түүнчлэн, компани сүүлийн жилүүдэд ашигтай ажиллаж байгаа учраас хувьцаа эзэмшигч нартаа ногдол ашиг хуваарилж байгаа билээ. Өнөөдрийн байдлаар “Эрдэнэс Тавантолгой” ХК-ийн 73 хувь орчим хувийг "Эрдэнэс Монгол" нэгдэл, 26.94 хувь орчим хувийг Монгол Улсын 3.4 сая иргэн, 0.06 хувийг үндэсний 487 аж ахуйн нэгж эзэмшиж байна.

Тэгвэл "Эрдэнэc Тавантолгой"-н 1072 ширхэг хувьцаагүй олон иргэн бий. Тиймээс УИХ тогтоол баталж 2012 оны дөрөвдүгээр сарын 11-ээс хойш төрсөн иргэдэд “Эрдэнэс Тавантолгой” ХК-ийн 1072 хувьцааг эзэмшүүлсэн. Тус тогтоолоор 2012 оны дөрөвдүгээр сарын 11-ээс 2023 оны арванхоёрдугаар сарын 31-ийг хүртэл төрсөн иргэн бүхэнд 1072 ширхэг хувьцааг олгосон. Харин үүнээс хойш буюу 2024 оны нэгдүгээр сарын 1-ээс хойш төрсөн Монгол Улсын иргэд "Эрдэнэс Тавантолгой"-н 1072 хувьцааг олгохгүй байгаа юм. Үүнээс гадна өмнө нь хувьцаатай байсан ахмад настан болон хөгжлийн бэрхшээлтэй иргэд 1072 ширхэг хувьцаагаа нэг сая төгрөгөөр үнэлэн Засгийн газарт зарсан бол оюутнууд сургалтын төлбөртөө өгсөн байдаг. Мөн Ч.Сайханбилэгийн Загийн газрын үед иргэд хувьцааныхаа тодорхой хэсгийг зарсан. 

"Эрдэнэс Тавантолгой" ХК ашигтай ажиллаж хувьцаа эзэмшигчдэдээ ногдол ашиг тарааж байгаа хэдий ч өнөөдөр иргэдэд олгосон хувьцаагаа арилжаалах, өвлүүлэх, шинэ төрсөн иргэндээ хувьцаа олгох гэх мэт асуудлууд ямар ч зохицуулалтгүй өнөөдрийг хүрч байна. Учир нь Компанийн тухай хуулийн 3.7-д хувьцаа эзэмшигчийн оруулсан хөрөнгө нь хувьцаанд хуваагдаж, хувьцаа нь үнэт цаасны арилжаа эрхлэх байгууллагад бүртгэгдэж, нийтэд чөлөөтэй арилжаалагддаг компанийг нээлттэй хувьцаат компани гэж тодорхойлдог. “Эрдэнэс Тавантолгой” ХК нь хаалттай хувьцаат компани тул одоогоор хувьцаа нь нээлттэй арилжаалагдах боломжгүй байгаа юм. Харин тус компани нь Хөрөнгийн биржид бүртгүүлснээр хувьцаагаа нээлттэй арилжаалах эрх үүснэ. Д.Сумъяабазар Уул уурхайн сайдаар ажиллаж байхдаа "Эрдэнэс Тавантолгой" компанийг Хөрөнгийн биржид бүртгүүлнэ гэж байсан ч ажил хэрэг болж чадаагүй зогссон. Тиймээс цаашдаа "Эрдэнэс Тавантолгой"-н хувьцааг шинэ төрсөн иргэддээ олгох уу, нас барсан иргэдийн хувьцааг өвлүүлэх үү, хувьцаагаа төрд зарсан иргэд дахин хувьцаа худалдаж авах боломжтой юу гэдэг асуудлуудад оновчтой хариулт өгөх хэрэгцээ шаардлага үүссээр байна.