Сүүлийн үеийн судалгаагаар цитрусын төрлийн жимс хэрэглэх нь сэтгэл гутралын эрсдэлийг бууруулахад тустай болохыг ажиглажээ. Харвардын Анагаахын сургуулийн багш, Массачусетсийн Ерөнхий эмнэлгийн эмч Рааж Мехтагийн удирдсан судалгаагаар өдөрт нэг ширхэг жүрж идэх нь сэтгэл гутралын эрсдэлийг 20 хувиар бууруулдаг болохыг тогтоожээ.

Үүний шалтгаан нь цитрус жимс хүний гэдэсний бичил биетэн болох Faecalibacterium prausnitzii-ийн өсөлтийг дэмжиж, серотонин, допамин зэрэг сэтгэл санааг дээшлүүлдэг нейротрансмиттерүүдийн ялгаралд нөлөөлдөгтэй холбоотой гэж үзэж байна.

Судалгаанд 1989 оноос эхлэн 100,000 гаруй эмэгтэйг хамруулсан "Сувилагчдын эрүүл мэндийн судалгаа II"-ийн мэдээллийг ашигласан байна. Судлаачид цитрус жимс их хэрэглэдэг хүмүүсийн дунд сэтгэл гутралын түвшин бага байгааг ажигласан бөгөөд энэ үр дүнг эрчүүдийг хамарсан ижил төстэй судалгаагаар баталгаажуулжээ. Мөн өтгөний шинжилгээгээр цитрус их хэрэглэдэг хүмүүсийн гэдэсний бичил биетэнд F. prausnitzii илүү их хэмжээгээр байдаг нь тогтоогдсон байна.

Энэхүү нөлөө нь хүний бие дэх нейротрансмиттерийн түвшинд нөлөөлдөг тодорхой бодисын солилцооны замаар дамждаг аж. Үр дүнг бүрэн баталгаажуулахын тулд цаашдын клиник туршилтууд шаардлагатай боловч энэ судалгаа хоол хүнс сэтгэцийн эрүүл мэндэд хэрхэн нөлөөлж болохыг харуулж байна. Цитрус жимс хэрэглэх нь сөрөг гаж нөлөө багатай учир уламжлалт эмчилгээний хажуугаар хэрэглэх энгийн, байгалийн арга болж болох юм. Уг судалгаа хооллолт болон сэтгэл санааны эрүүл мэндийн хоорондын хамаарлыг илүү гүнзгий судлах боломжийг нээж байгаа аж.

Эх сурвалж: https://news.harvard.edu/gazette/story/2025/02/eating-citrus-may-lower-depression-risk/