Монгол Улсын Засгийн газрын ээлжит хуралдаан өнөөдөр /2025.03.19-нд/ болж өндөрлөлөө. Өнөөдрийн хуралдаанаар Улаанбаатар хотын агаарын бохирдлыг бууруулах чиглэлээр авах арга хэмжээний тухай тогтоолыг баталсан юм.
Нийслэлийн Засаг дарга бөгөөд Улаанбаатар хотын захирагч Х.Нямбаатар: Нийслэл Улаанбаатар хотод 200 мянга орчим айл хатуу түлш буюу нүүрсний хэрэглээтэй байна. Нийт 2500 орчим нам даралтын зуух, 170 орчим дунд оврын уурын зуух нь агаарын бохирдлыг үүсгэж байгаа юм. Үүнээс гадна Авто тээврийн улсын бүртгэлийн төвд бүртгэлтэй 804 мянган машинаас өдөрт 500-600 мянга гаруй тээврийн хэрэгсэл замын хөдөлгөөнд оролцож, 2,3,4-р ДЦС болон Амгалангийн ДЦС гэсэн их үүсвэрүүд агаарын бохирдлыг үүсгэж байгаа нь ЖАЙКА ОУ-ын байгууллагын судалгаанд бий.
Нийт 56 хувийн агаарын бохирдлыг эзэлж буй хүчин зүйл нь 200 мянга гаруй айл өрхийн хатуу түлшний хэрэглээ юм. Тиймээс өнөөдрийн Засгийн газрын хуралдаанаар 2025-2026 онд шилжих, өвөлжилтийн бэлтгэлийг хангах чиглэлээр 32-50 мянган айл өрхийг хийн шилжилтэд шилжүүлэх тогтоолын төслийг баталлаа.
Айл өрхийн дулаалгын асуудлыг стандартад нийцүүлж, дулаан алдагдлыг бууруулж, айл өрхүүд хатуу түлшний хэрэглээнээс сайн дураараа татгалзаж чадвал нийслэл Улаанбаатар хотоос айл өрхүүдэд хийн түлшний зуухыг байрлуулж, аюулгүй ажиллагааны зааварчилгааг өгөх болно. Мөн халаалтын улирлын есдүгээр сарын 15-наас тавдугаар сарын 15 хүртэлх хугацаанд сар бүр 100 мянган төгрөгийн хийн түлшний татаасыг олгох болно.
Айл өрхүүд дулаан алдалтаа бууруулж, стандартын шаардлага хангасан тохиолдолд л хийн зуух руу шилжих шилжилтийг хийхээр төлөвлөсөн. МУЗГ-ын тухай хуульд заасны дагуу бүх яамдуудын чиг үүрэгт агаарын бохирдлыг бууруулах чиг үүрэг орсон байдаг тул үүргийнхээ дагуу айл өрхүүдийн дулаалгын стандартыг сахиулах, дэмжлэг туслалцаа үзүүлэх чиглэлээр ажиллах юм. Яамдуудыг гэр хорооллын айлуудыг хийн шилжилтэд шилжихэд бүсчилсэн байдлаар ажиллах чиг үүргийг тогтоолд тусгалаа.
Айл өрхүүдийн дулаалгын стандартад шилжихэд зэвсэгт хүчин, хилийн цэрэг, төрийн цэргийн байгууллагуудыг дэмжлэг үзүүлж оролцуулах болно. Мөн төрийн өмчит компаниудыг дэмжлэг үзүүлж ажиллах талаар тогтоол баталлаа.
Нэмж хэлэхэд, Монгол Улсын одоогийн хийн түлшний жилийн хэрэглээ 46 мянган тонн байгаа. Иймээс бид 32-50 мянган айл өрхөд шилжүүлэхэд энэ хэрэглээ хамгийн багадаа 100 мянган тоннын хэрэглээ рүү шилжихээр байна. Иймд энэ чиглэлээр хийн бизнес эрхлэгч, импортлогч ААН-үүдтэй уулзалт зохион байгуулж, хамтран ажиллах гэрээний төсөлд ажиллах байгаа.
Иргэдийн зүгээс орон сууцжуулах бодлогод илүү хүлээлттэй байгаа. Бид 1984 оноос хойш 41 жилийн хугацаанд нэг ч ДЦС нэмж бариагүй. Гэхдээ өнгөрсөн жил цахилгаан хангамжийн үйлдвэрлэлийг нэмэгдүүлж чадсаны үр дүнд эрчим хүчний хэрэгцээ нэмэгдсэн. Зарим бүсчилт дотор айл өрхүүд хийн түлш хэрэглэхгүй. Харин цахилгаан халаалтын хэрэгсэл хэрэглэе гэвэл мөн адил цахилгаан халаалтад шилжүүлэх, үүнтэй холбоотой цахилгаан хэрэглээтэй айл өрхөд 100 мянган төгрөгийн татаасыг олгох болно.
Зургаадугаар сард Улаанбаатар хотод 2000 орчим орон сууцны төслүүдэд улсын комисс ажиллаж, ашиглалтад орохоор байна.
Байгаль орчин, уур амьсгалын өөрчлөлтийн сайд С.Одонтуяа: Энэхүү асуудалд төрийн захиргааны бүх байгууллагууд оролцохоор болсон. Агаарын бохирдлыг бууруулах ажлыг бүх нийтийн аян болгож өрнүүлэх байгаа. Байгууллагууд хороо, дүүргээр нь хувааж авч ажиллахад ямар стандарт барих талаар тодорхой болгож “Дулаалгатай гэр” гэх стандартыг гаргах юм. Аль болох пассив хаус руу олон нийтийг чиглүүлэх, дэмжих тал дээр анхаарах болно.
Арилжааны банк болон Төрийн банк хөнгөлөлттэй зээлийг олгох талаар Б.Жавхлан сайдад үүрэг даалгавар өгөгдсөн байгаа.
