“Хоёр Чуулган” буюу Бүх Хятадын ардын төлөөлөгчдийн их хурал (NPC) болон Хятадын Ардын Улс Төрөөр Зөвлөлдөх Зөвлөлийн (CPPCC) хурал Бээжинд гуравдугаар сарын 5-13-ны хооронд болж, өндөрлөлөө. Уг чуулганыг жил бүр уламжлал болгон зохиодог бөгөөд Хятадын төр засаг, эдийн засаг, нийгмийн талаархи чухал шийдвэрүүдийг хэлэлцдэг.
Тэгвэл Хятадын удирдагчид өнгөрсөн долоо хоногт дэлхийн хоёрдугаар том эдийн засагт тулгарч буй бэрхшээлүүдийг даван туулахын тулд улсаа технологийн хүчирхэг гүрэн болгон хувиргах, мөн зорилтот өсөлтийг хангахын тулд зарлагаа нэмэгдүүлэх төлөвлөгөөгөө танилцуулсан юм.
Ням гарагт гарсан шинэ мэдээллээр Хятадын хэрэглээний үнэ хоёрдугаар сард 13 сарын хамгийн доод түвшинд хүрсэн нь эдийн засгийн уналтын дарамтыг харуулж байгаа аж. Энэ жил Хятадын эдийн засгийн хямралыг шийдэх, залуучуудын ажилгүйдлийг бууруулах, мөн технологийн салбарын талаарх намын хандлагын өөрчлөлтүүд тод томруун ажиглагдлаа.
2025 оны Хятадын Хоёр Чуулганы үеэр гаргасан гол шийдвэрүүд:
ДНБ-ийг 5.5 хувь ба үүнээс давуулах, худалдан авалтын нэмэгдүүлж, үйлдвэрлэлтийн чанараа сайжруулах.
ДНБ-ийг 4 хувь байх хэмжээнд тогтоож, эдийн засгийг дэмжихийн тулд төсвийн зардлыг нэмэгдүүлэх бодлого баримтална.
Ажил эрхлэлт, нийгмийн халамж:
2025 онд 12 сая гаруй шинэ ажлын байр бий болгох зорилго тавьжээ.
Төрөөс орон сууцны хөнгөлөлттэй зээл, ажил эрхлэлтийг дэмжих бодлого хэрэгжүүлэхээр болов.
Эмийн үнийг тогтворжуулах, эрүүл мэндийн даатгалын татаасыг 30 юаниар нэмэгдүүлэх, ахмадын тэтгэврийн хэмжээг 20 юаниар нэмэгдүүлэх шийдвэр гаргасан.
Уур амьсгал, эрчим хүчний бодлого:
2025 он хүртэл шинэ эрчим хүчний зорилтууд тогтоож, нүүрсний хэрэглээг бууруулах чиглэлд анхаарч байна.
2025 онд цэргийн төсвөө 7.2 хувиар нэмэгдүүлж, 1.78 их наяд юань зарцуулахаар болов. Энэ нь сүүлийн 10 жилийн турш жил бүр нэг оронтой тоогоор нэмэгдэж буйг илтгэж байна.
Боловсрол, шинжлэх ухааны хөгжил:
БНХАУ-ын дарга Ши Жиньпин боловсрол, технологийн хөгжлийг онцлон тэмдэглэж, сургуулиудад илүү бие даасан эрх олгох, менежментийн системийг сайжруулах талаар шинэчлэл хийхийг уриалав.
Үл хөдлөх хөрөнгө, хөрөнгийн зах зээлийг тогтворжуулах бодлого хэрэгжүүлж, томоохон дэд бүтэц, нийтийн ашиг сонирхол бүхий төсөлд хувийн хэвшлийг татан оролцуулах арга хэмжээг авч байна. Ийнхүү аж үйлдвэрийн салбарыг шинэчлэх, хөгжиж буй шинэ салбаруудыг дэмжих чиглэлд анхаарал хандуулж байгаа юм.
Дотоодын хэрэглээг нэмэгдүүлэх:
Орлогыг өсгөх, хүүхэд асрах тэтгэмж олгох зэрэг арга хэмжээг танилцуулж, иргэдийн худалдан авах чадварыг сайжруулах тусгай төлөвлөгөө гаргасан.
2025 оны Хоёр Чуулганаар эдийн засгийн тогтвортой байдал, нийгмийн халамж, батлан хамгаалах, боловсрол, зах зээлийн хөгжил зэрэг голлох асуудлуудад онцгойлон анхаарал хандууллаа.
Хятадын 2025 оны Хоёр Чуулганы шийдвэрүүдийн Монголд үзүүлэх нөлөө
Хятад улс нь дэлхийн хоёр дахь том эдийн засаг бөгөөд Монголын хамгийн том худалдааны түнш тул тус улсын гаргасан шийдвэрүүд Монгол болон дэлхийн эдийн засаг, улс төрийн байдалд шууд нөлөө үзүүлэх нь дамжиггүй.
Эдийн засгийн өсөлт, худалдааны харилцаа
Хятадын эдийн засаг тогтвортой өсвөл Монголын нүүрс, зэс, бусад түүхий эдийн эрэлт өндөр хэвээр байх магадлалтай. Харин эдийн засгийн удаашрал тохиолдвол экспорт буурч, улсын төсөвт дарамт учирч болзошгүй.
Хятад улс хөрөнгийн болон үл хөдлөх хөрөнгийн зах зээлээ тогтворжуулах бодлого баримталж байгаа нь Монголын санхүүгийн тогтвортой байдалд эерэг нөлөө үзүүлнэ.
Дэд бүтэц, хөрөнгө оруулалт
Хятадын засгийн газрын зардлын өсөлт нь Монголтой хиллэдэг авто болон төмөр замын төслүүдийг хурдасгах боломжтой.
Төр-хувийн хэвшлийн хамтын ажиллагааг дэмжих бодлого хэрэгжсэнээр Монголын эрчим хүч, уул уурхай, ложистикийн салбарт Хятадын хөрөнгө оруулалт нэмэгдэх магадлал бий.
Батлан хамгаалах ба гадаад бодлого
Хятадын батлан хамгаалах төсөв 7.2 хувиар өссөнөөр Монгол Улсад шууд заналхийлж буй хэрэг биш ч бүс нутгийн аюулгүй байдлын орчин өөрчлөгдөж болзошгүй.
Монгол Улсын хувьд Хятадын эдийн засгийн тогтвортой байдал экспорт, хөрөнгө оруулалт, дэд бүтцийн хөгжилд чухал үүрэг гүйцэтгэх боловч дэлхий дахинд Хятадын бодлого нь зах зээлийн тогтвортой байдал, худалдааны чиг хандлага, геополитикийн динамик өөрчлөгдөхөд нөлөөлөх эрсдэлтэй.
