DURAN.AI үүсгэн байгуулагч А.Ууганбаяр, А.Амарбаяр нартай ярилцлаа. Тэд Монгол Улсад анх удаа хиймэл оюун ухаанд суурилсан бүтээлийн уралдаан зарлаад байгаа юм. Энэ талаар дэлгэрэнгүй ярилцсан юм.

-Хиймэл оюунд суурилсан тэмцээнийхээ талаар танилцуулаач?

 -Бидний өдөр тутмын ажил амьдралын тогтсон хэв маягийг технологийн хөгжил, тэр дундаа хиймэл оюун ихээр өөрчилж, технологийн хамаарлыг багасгасаар байна. Энэ нь хувь хүн, баг хамт олныг богино хугацаанд оновчтой шийдэл гаргаж амжилтад хүрэх бодит боломжийг бүрдүүлж эхэлсэн. Иймд хиймэл оюуныг бүтээлчээр ашиглан бидний амьдралд тулгамдаад буй асуудлыг шийдвэрлэх гарц гаргалгааг эрэлхийлэх, хиймэл оюуны чадамжийг олон нийтэд таниулах, цаашлаад нийгмийн хөгжилд хувь нэмэр оруулах зорилгоор Aithon 2025 Монголын хиймэл оюуны анхдугаар бүтээлийн уралдааныг нээлттэй зарласан.

-Яагаад “Aithon” гэж нэрлэх болсон бэ?

-Хакатон зэрэг тэмцээнтэй харьцуулбал хамрах хүрээ өргөн, хугацааны хувьд уян хатан болохоор цаг заваараа контентоо бүтээх боломжтой. Түүнчлэн бүтээлүүдийн хувьд 100 хувь хиймэл оюун ашигласан бас эх хэл дээрээ байх шаардлагатайгаараа онцлог юм. Эхний шатны шалгаруулалт ч цахимаар явагдах зэрэг цаг хугацаа, газарзүйн байршил харгалзахгүй зэрэг давуу тал олон байгаа учир AI буюу хиймэл оюун гэдэг үгийн товчлол дээр “thon” залгасан хэрэг. Ялангуяа сүүлийн үед видео дүрс, зураг, дэвсгэр ая, хүний яриаг тексттэй нь хиймэл оюуны тусламжтай богино хугацаанд өртөг багатай бүтээх тохиолдлууд олон улсад түгээмэл болж байна. Монгол хүн бүр технологи тэр дундаа хиймэл оюуны хөгжлөөс хоцрохгүй, олон улстай хөл нийлүүлж алхаасай гэж хүсээд “Aithon” хэмээн нэрлэхээр шийдсэн. 

-Ямар хүмүүс оролцох боломжтой вэ?

-Манай тэмцээний хувьд дан хөгжүүлэгчид, инженерүүд гэхээсээ илүү хиймэл оюуныг сонирхдог хүн бүрд нээлттэй. Орчин үед бага ангийн сурагч ч технологийг маш сайн ашиглаж байна. Ямар нэг тоглоом тоглоод эсвэл аппликейшн тасралтгүй ашиглаад байгаа нь тоглоод байгаа юм шиг харагдах хэр нь аль хэдийн ямар нэг байдлаар болоод эхэлсэн хэлбэр гэж харж болохоор байна. Учир нь хиймэл оюун тухайн хэрэглэгчийн түвшин, сонирхлыг нь аль хэдийн тодорхойлчихсон өөрт нь тохирсон даалгавар санал болгоод, сонирхолтой байлгаад байгаа явдал. Тэгэхээр технологи ашиглаж л байгаа бол хиймэл оюуны хэрэглэгч байж болно гэж үзээд нас, мэргэжил, салбар, газарзүйн байршил харгалзахгүй Монгол улсын өнцөг булан бүрээс оролцох боломжтой. Өөрөөр хэлбэл ЕБС-ийн сурагчдаас авхуулаад салбар, салбарын экспертүүд ч оролцох боломжтой. Бид 100% хиймэл оюунаар бүтсэн контентыг жишээ болгож пэйж дээрээ байршуулсан. Тэндээс санаа авч уралдаанд оролцох бүрэн боломжтой.

-Тэмцээний үндсэн шаардлага юу вэ?

-Монгол хэлээр ярьдаг хүмүүс өндөр хөгжилтэй орнуудыг бодвол цөөн учир бид аливаа технологийн хөгжлөөс хоцорчих гээд байдаг. Тиймээс бид эх хэл дээрээ текстийг яриа болгон хөрвүүлдэг Цэцэн төслийнхөө БЕТА (эхний туршилтын) хувилбараар дамжуулан хиймэл оюуны ач холбогдол, боломжийг нийгэмд таниулах үндсэн зорилготой. Тиймээс Стартап Терминалтай хамтран Монгол Улсад хамгийн анхны хиймэл оюунд суурилсан бүтээлийн уралдааныг зохион байгуулж байгаа юм. Цэцэн төслийн хамгийн гол онцлог бол яг хүн шиг ярих нөхцөлийг бүрдүүлэхээр зорьж байна. Та өөрийнхөө хоолойгоор ч хүссэн текстээ, хүссэн хурдаараа уншуулах боломжтой. Ялангуяа миний хувьд бол камерын өмнө гарахаараа сандраад ярих зүйлийнхээ дарааллыг хольж солих тохиолдол байдаг /инээв/. Тэмцээний даалгавар ч маш энгийн 3 хүртэлх минутын видео контент бүтээж ирүүлэх юм.

-Та бүхэнд нэмж хэлэх зүйл байна уу?

-Бид Цэцэн (ярих), Дэлдэн (сонсох), Дуран (хайлт) гэсэн хиймэл оюунд суурилсан, дэд бүтцийн  төслүүдийг хэрэгжүүлж эхэлсэн. Хиймэл оюуны өгөөжийг Монгол хүн бүр эх хэл дээрээ хүртээсэй гэж хүсэж байна. Нөгөөтэйгүүр бид дээрх төслүүдээ хүссэн хүн бүр, startup-ууд, байгууллага болгон API байдлаар ашиглах боломжийг бүрдүүлэх үндсэн зарчим барьж ажиллана. Харин бусад нь энэ бэлэн технологийг ашиглаад нийгэмдээ илүү чухал зүйлдээ анхаарч, цаг хугацаа битгий алдаасай гэж хүсэж байна. Ингэж чадвал бид хамтдаа хөгжиж чадна гэж итгэж байна. Дугуйг хүн бүр зохион бүтээгээд байвал цаг хугацаа, зардал мөнгө, хүн хүч талаасаа хүндрэлтэй шүү дээ.

Ингээд эцэст нь “Aithon 2025” тэмцээндээ заавал оролцож эх хэл дээрээ хөгжүүлж буй системийг ашиглаж үзэхийг уриалж байна. Бүртгэл 2025 оны гуравдугаар сарын 22-ныг дуустал явагдана. Илүү дэлгэрэнгүй мэдээллийг Facebook Duran.AI пэйжээр дамжуулан авах боломжтой.

-Ярилцсанд баярлалаа. Та бүхэнд амжилт хүсье.