УИХ-ын хаврын чуулган өнөөдөр нээлтээ хийнэ. Энэ нь 126 гишүүнтэй парламентын анхны хаврын чуулган юм. Энэ удаагийн хаврын чуулганаар нэлээд олон чухал хуулийн төслүүдийг хэлэлцэхээр төлөвлөөд байгаа билээ. Тухайлбал, иргэд, аж ахуй нэгжүүдийн хувьд нэлээд өндөр хүлээлт үүсгээд буй татварын багц хуулийн төслүүдийг хэлэлцэн батална. Мөн хэрэглэгчийн эрх ашгийг хамгаалах, өрсөлдөөний тухай хуулийн төслүүдийг шинэчлэн боловсруулж, батлуулна гэдгийг УИХ-ын дарга Д.Амарбаясгалан мэдэгдсэн.

Түүнчлэн, энэ хаврын улс төр гэж хэлж болох стратегийн ач холбогдол бүхий ордод төрийн эзэмшлийн хувь хэмжээг тогтоохтой холбоотой асуудлуудыг хэлэлцэж, нэг талдаа гарах болов уу. Энэ хүрээнд Засгийн газраас Ухаа худаг орд газартай холбоотой асуудлаар УИХ-д тогтоолын төсөл өргөн барьж, уг асуудлыг УИХ-аар хэлэлцүүлэхээр шийдвэрлэсэн билээ.

УИХ 2007 онд тогтоол гаргаж, Тавантолгой орд газар, тэр дундаа "Энержи Ресурс" компанийн эзэмшиж байсан тусгай зөвшөөрлийн талбай нь стратегийн ач холбогдол бүхий орд газарт хамруулсан байхад хувийн компани дур мэдэн эзэмшүүлсэн нь Үндсэн хууль болоод бусад хууль тогтоомжийг зөрчсөн гэж Засгийн газар үзээд байгаа юм. Уг асуудлыг УИХ-аар эцэслэн шийдвэрлүүлнэ гэж Засгийн газраас мэдэгдээд буй.

Дээрх асуудал нь олон улстөрч, аж ахуйн нэгжүүдийн эрх ашгийг хөндөх учраас ил, далд улс төр өрнө магадлалтай юм.