Аж үйлдвэр, эрдэс баялгийн сайд Ц.Туваан УИХ-ын хаврын чуулган нээсэн энэ өдөр ЗГ-аас Гашуунсухайт-Ганцмод боомтын хил холболтын төмөр замын хэлэлцээрийг соёрхон батлуулах тогтоолын төсөл өргөн барьсан талаар мэдээллээ. Түүнчлэн, нүүрсний үнийн уналт удаан үргэлжлэх эрсдэлтэй байгааг санууллаа.

Аж үйлдвэр, эрдэс баялгийн сайд Ц.Туваан: Монголын уул уурхайн биржийн хуулиар борлуулсан нүүрсийг тухайн худалдан авсан байгууллагын терминал дээр хүргэж өгч байгаа. Тэгэхээр нийлүүлэлтийн тоо хэмжээ адилхан гарч байгаа гэж ойлгож болно. Бодитой зүйл бол нүүрсний үнэ буурсан. Бид тонн нүүрсийг 105 доллароор дунджилж 83 сая тонн гаргана гэж төсөвт тооцсон. Өнөөдрийн байдлаар нүүрсний дундаж ханш 88 ам.долларт хүрсэн. Өөрөөр хэлбэл, 20-25 ам.доллароор ханш буурсан. Уул уурхайн бирж дээр дөрвөн төрлийн нүүрс борлуулдгаас хоёр төрлийн нүүрс нь худалдан авагч байгууллага оролцохгүй байгаа. Энэ нөхцөл байдал богино хугацаанд үргэлжлэхгүй байх гэж харж байна. Засгийн газар яаралтай энэ асуудлын хүрээнд хуралдаж уул уурхайн бүтээгдэхүүний экспортыг дэмжих, нэмэгдүүлэх ажлын хэсгийг Сангийн сайдаар ахлуулан байгуулсан. Өнөөдөр анхны хуралдаан болно. Бид ганц нүүрс гэлтгүй уул уурхайн биржээр худалдаалдаг бусад төрлийн түүхий эд бүтээгдэхүүн болон алтны олборлолтын хэмжээг нэмэгдүүлэх, бусад бүтээгдэхүүнийхээ экспортын экспортын хэмжээг нэмэгдүүлэх шаардлагатай. Ингэснээр нүүрснээс дутах орлогоо нөхөх зорилготой ажиллаж байна.

Алтны үнэ түүхэн дээд хэмжээнд байна. Тодруулбал, грамм алт 330-340 мянган төгрөг байгаа. Бид улсын төсөвт алтны үнийг 1850 ам.доллар, хэмжээгээ 18 тонноор тооцоолж тавьсан. Харин алт 2900 болсон учраас болж олборлох хэмжээгээ ­20 тоннд хүргэсэн тохиолдолд бид нэмэлтээр 760 орчим сая  доллар зөвхөн алтнаас олох тооцоолол хийсэн. Энэ асуудлыг яаралтай шийдэж УИХ-аар оруулах төлөвлөгөөтэй байна. Нүүрсний үнэ АНУ болон БНХАУ-ын хоорондын худалдааны маргаанаас үүдэлтэй буурч байна. Өөрөөр хэлбэл, АНУ өндөр тариф тавьснаас болж Хятадын гангийн экспорт буурч байна. Үүнтэй холбоотойгоор ган боловсруулахад хэрэглэдэг манай улсын коксжих нүүрсний борлуулалт буурах хандлагатай байна. Бид тун удахгүй БНХАУ-ын Хөгжил шинэтгэлийн хороон дээр Монгол Улсын нүүрсний экспорт, хэрэглээтэй холбоотой асуудлаар тодорхой уулзалтууд хийнэ.