Өвөр Монголын өөртөө засах орны нийслэл Хөх хот хүүхдийн асаргааны шинэ бодлогоо танилцуулж, шинээр төрсөн хүүхэд бүрт 100,000 юань (ойролцоогоор 13,800 ам.доллар) хүртэлх татаас, бусад хөнгөлөлттэй бодлого хэрэгжүүлэхээр болжээ. Энэ тухай БНХАУ-ын Төв телевиз (CCTV News) бямба гарагт мэдээлэв.

Бээжингээс хоёр цагийн галт тэрэгний зайд орших Хөх хотын нийт хүн ам 3.6 сая орчим бөгөөд тус хотын төрөлтийн түвшин 2019-2023 оны хооронд буурах хандлагатай байжээ. 2023 онд төрөлтийн түвшин 1,000 хүн тутамд 5.58 байсан бол 2024 онд бага зэрэг өссөн байна. Үүний шалтгаан нь Луу жилд хүүхэдтэй болохыг илүүд үзэх хосуудын тоо нэмэгдсэнтэй холбоотой аж.

Шинэ бодлогын хүрээнд эцэг эхийн нэг нь Хөх хотын оршин суугчийн бүртгэлтэй байх тохиолдолд 2024 оны гуравдугаар сарын 1-ний өдрөөс хойш гурав дахь хүүхдээ төрүүлсэн гэр бүлүүдэд 100,000 юанийн татаас олгох юм. Энэ татаасыг хүүхдэд 10 нас хүртэл нь жил бүр 10,000 юанийн хэмжээгээр олгох аж. Мөн ганц хүүхэдтэй гэр бүлд 10,000 юань, хоёр дахь хүүхдээ төрүүлсэн гэр бүлд 50,000 юанийн татаас олгохоор болжээ. Энэ нь бусад хотуудтай харьцуулахад харьцангуй өндөр хэмжээний урамшуулал юм.

Хөх хотын Эрүүл мэндийн хорооны дэд дарга Ян Жун уг татаасын хөтөлбөр нь хүн амын өсөлтийг дэмжих гол арга хэмжээ гэдгийг онцолсон байна. Тэрээр энэ бодлого гэр бүлийн санхүүгийн дарамтыг бууруулах, төрөлтийн талаарх санаа зовнилыг багасгахын зэрэгцээ хүүхдийн бараа бүтээгдэхүүн, боловсрол зэрэг салбаруудын хөгжлийг дэмжинэ гэж найдаж байгаагаа илэрхийлэв.