Монголын үйлдвэрчний эвлэлийн холбоо өнөөдөр "Аливаа ялгаварлан гадуурхалт, дарамт, хүчирхийллээс ангид ажлын байрны төлөө" уриан дор Дарамт хүчирхийллийн тухай 190 дүгээр конвенцод Монгол Улс нэгдэн орох уриалгыг гарган тайван жагсаал зохион байгууллаа.

Ажил эрхлэлт хөдөлмөрийн харилцааны суурь зарчим нь дарамт хүчирхийлэл, ялгаварлан гадуурхалтаас ангид байхад оршдог. Хөдөлмөрийн хүрээн дэх аливаа зөрчлийн суурь шалтгаан нь ажлын байрны дарамт, хүчирхийлэл, ялгаварлан гадуурхалт болохыг ОУХБ-ын 100 жилийн ой 100-ны тунхгаар дэлхийн улс орнуудын Үйлдвэрчний эвлэл, Засгийн газар, ажил олгогч нар санал нэгтэйгээр хүлээн зөвшөөрсөн байдаг.

Манай улсад ажлын байрны дарамт хүчирхийллийн талаар Хүний эрхийн үндэсний комиссын 2016 онд Төрийн албан хаагчдын дунд хийсэн судалгаагаар ажлын байрны дарамт тэр дундаа ажлын байрны бэлгийн дарамтад өртдөг болохыг харуулсан байна.

Мөн ОУХБ-тай хамтран Эрүүл мэндийн салбарын ажилтнууд, Орон сууц нийтийн аж ахуйн салбарын ажилтнуудыг хамруулсан судалгаагаар ажлын байрны дарамт тэр дундаа гуравдагч этгээдээс ажилтнуудад ирж буй дарамт их байгаа нь тогтоогджээ.