Эрчим хүчний зохицуулах хорооноос цахилгааны үнийг 2024 оны арваннэгдүгээр сард ААН-ийн цахилгааны үнийг 30 хувиар, айл өрхийн хэрэглээг гурван шатлалтай нэмсэн. Засгийн газраас цахилгаан, дулааны үнийг зэрэг нэмэхээр төлөвлөж байсан ч ААН болон иргэдэд хүндрэл учруулахгүйн тулд дулааны үнийг дараа нь нэмэхээр зохицуулсан. Тэгвэл цахилгааны үнийг нэмсэн нь бизнес эрхлэгчдэд хэрхэн нөлөөлж буй талаар тодрууллаа.М.Золзаяа: Дэлхийд гарах мөрөөдөл алсарсаар байна”Хас гутал” ХХК-ийн үүсгэн байгуулагч М.Золзаяа: Цахилгааны үнэ нэмэгдсэнийг би гэнэт мэдсэн. Цахилгааны үнэ нэмэгдсэнээр бизнес эрхлэгчдэд ирэх дарамт улам л нэмэгдэж байна. Цахилгааны үнэ нэмэгдсэнтэй адил борлуулалт өсдөг бол өөр. Үнийн өсөлт гарах тусам ажилчдынхаа цалинг нэмэх шаардлагатай тулгарна. Бид зээлээс зээлийн хооронд үйл ажиллагаагаа явуулж байна. Хаана боломжийн үйлдвэрлэгч бидэнд зориулагдсан бага хүүтэй, урт хугацааны зээл, тусламж байна түүнийг хайж байна. Гэхдээ зээл авсан ч урд хормойгоороо хойд хормойгоо нөхөөд аргацааж байна. Сүүлийн үед бизнес эрхлэгчдэд ирэх ачаалал улам нэмэгдээд хуримтлал үүсгэх, үйлдвэрлэлээ өргөжүүлэх байдал хумигдаад байгаа. Ер нь дэлхийд гарах мөрөөдөл алсарсаар байна.Манай компани өмнө нь 10 гаруй ажилтантай байсан. Ковидоос хойш эх орондоо үйлдвэрлэл эрхэлье гэсэн сэтгэлтэй залуус багасаж гадаад улсыг зорих нь л олширч байна. Манай компани 2005 оноос гутал, арьсан болон жижиг эдлэлийн чиглэлээр үйл ажиллагаагаа явуулж байгаа. Өмнө нь жижиг эдлэл, гутал гээд хоёр үйлдвэртэй байсан бол одоо ашиглах шаардлагагүй зардал өндөр гараад байгаа учраас нэг үйлдвэрээ хаасан. Сүүлийн үед борлуулалт ч багасаж өмнөх шигээ биш болсон. Үүнтэй холбоотойгоор ажилчдаа цомхотгож, үйлдвэрийн байраа ч багасгасан.
