Булган аймгийн Хутаг-Өндөр сум Эг, Сэлэнгийн бэлчирт Хантай багийн нутагт баригдах Эгийн голын усан цахилгаан станц өдгөө 30 гаруй жил яригдаж буй төсөл юм. Эгийн голын 310 мегаваттын УЦС-ын төслийг 2024-2032 онд хэрэгжүүлэхээр төлөвлөсөн. Нийт хөрөнгө оруулалт нь 3 их наяд 700 тэрбум төгрөг юм.

Эгийн голын усан сан баригдвал зөвхөн усны нөөцийг зохицуулах үүрэг гүйцэтгэхээс гадна Монгол Улсын эрчим хүчний тогтвортой байдлыг хангах, оргил ачааллыг тохируулах, жилд 438.7 мянган тонн нүүрсний хэрэглээг бууруулах, хүлэмжийн хийн ялгаруулалтыг 709 мянган тонноор багасгах, цэвэр усны 5.7 тэрбум м³ нөөц бүрдүүлэх стратегийн чухал ач холбогдолтой мега төсөл юм. Тэгвэл энэхүү мега төслийн үйл явц, хэрэгжилт ямар байгаа талаар МУЗГ-н Хэрэгжүүлэгч эгентлаг, Усны газрын дарга З.Батбаяраас тодрууллаа.

Тэрээр “Эгийн гол дээр урсцын тохиргоо хийж, усан сан байгуулах асуудал олон жилийн турш яригдаж ирсэн. Эг гол нь Хөвсгөл нуураас эх авч, Сэлэнгэ мөрөнд цутгадаг бөгөөд Сэлэнгэ мөрөн Байгаль нуурт орж буй нийт усны 50 хувийг бүрдүүлдэг онцгой ач холбогдолтой гол юм. Байгаль нуурын усны түвшин, бохирдлын асуудал, цаашдын тогтвортой байдал нь Сэлэнгэ мөрний урсацтай салшгүй холбоотой.

Оросын холбооны улс болон Монгол Улсын Байгаль орчны асуудал эрхэлсэн Засгийн газрын гишүүд өнгөрсөн оны есдүгээр сарын 2-нд хамтран Байгаль нуур, Сэлэнгэ мөрнийг хамгаалах талаар санамж бичигт гарын үсэг зурсан. Үүнтэй холбоотойгоор хоёр улсын Шинжлэх ухааны академийн төлөөлөгчидтэй хамтран ажлын хэсэг байгуулж, Байгаль нуурт үзүүлэх нөлөөллийг судлах ажлыг эхлүүлсэн. Энэ ажлын хүрээнд Москва хотноо хуралдаан зохион байгуулж, Байгаль нуурын экосистемийг хамгаалах гол арга зам нь цутгал голуудын урсцыг зохицуулан хамгаалах явдал гэдгийг онцолсон байгаа.