Starship нь SpaceX-ийн дахин ашиглах боломжтой хөөргөх систем хөгжүүлэх хөтөлбөрийн хамгийн сүүлийн төсөл бөгөөд Ангараг гарагт хүрэх урт хугацааны төлөвлөгөөний нэг хэсэг юм. Мөн NASA-гийн Artemis хөтөлбөрийн хүрээнд хүнийг сар луу буулгах хоёр үндсэн системийн нэгээр сонгогдоод байгаа билээ.
Тэгвэл 2023 оны дөрөвдүгээр сараас хойш SpaceX компанийн Starship хөлөг 8 удаа хөөрсөн бөгөөд 4 нь амжилттай, 4 нь бүтэлгүйтсэн байна.
SpaceX компанийн Starship хөлөг пүрэв гарагт Техасаас хөөрснөөсөө хэдхэн минутын дараа сансарт дэлбэрснээр Элон Маск 4 дэх бүтэлгүйдлээ хүлээж авсан юм. Тодруулбал уг туршилт Элон Маскийн Ангараг гараг руу хүн илгээх хөтөлбөрийн энэ жилийн хоёр дахь дараалсан бүтэлгүйтэл боллоо. Уг дэлбэрэлтээс үүдэн АНУ-ын Холбооны нисэхийн удирдах газар Флорида мужийн зарим хэсэгт агаарын хөдөлгөөнийг зогсоох шийдвэр гаргажээ. Мөн уг ослын шалтгааныг тодруулахаар албан ёсны мөрдөн шалгалт эхлүүлсэн гэж мэдэгдэв.
Олон нийтийн сүлжээнд тавигдсан бичлэгүүдэд Starship хөлөг задран унаж, Флорида мужийн өмнөд хэсэг болон Багамын арлуудын орчимд дэлбэрсэн хэсгүүд нь унаж байгаа харагджээ. SpaceX-ийн шууд дамжуулсан бичлэгт хөлөг сансарт хяналтаа алдаж эргэлдэн, хөдөлгүүрүүд нь унтарсны дараа хэсэгхэн хугацаанд задран бутарч буй дүр зураг буусан байна.
Starship хөлгийн энэ удаагийн найм дахь туршилт бүтэлгүйтсэн нь ердөө нэг сарын өмнөх долоо дахь туршилтын дэлбэрэлттэй адилхан үр дүн үзүүлсэн юм. Өндрөөрөө 123 метр буюу 403 фут хүрэх Starship нь Элон Маскийн хүн төрөлхтнийг Ангараг руу илгээх зорилтын гол цөм хэсэг юм.
Өмнөх бүтэлгүйтэл ба FAA-ийн шалгалт
Starship-ийн өмнөх нэгдүгээр сарын туршилт мөн адил хөөрснөөс 8 минутын дараа дэлбэрч, Карибын тэнгисийн арлуудын дээгүүр хаягдал унагаж, Туркс ба Кайкос арлууд дээр нэг автомашинд бага зэргийн эвдрэл учруулсан.
FAA агентлаг хувийн сансрын хөөргөлтүүдийг хянадаг бөгөөд SpaceX компанийг ослын шалтгааныг нарийвчлан судалж, шинэ нислэгийн зөвшөөрөл авах хүртэл дахин хөөргөхийг хориглосон аж. Өнгөрсөн сард FAA өмнөх шалгалтаа дуусаагүй байх үедээ энэ удаагийн туршилтыг хийх зөвшөөрөл олгосон юм. Тус агентлаг SpaceX-ийн Starship-ийн найм дахь нислэгийн зөвшөөрлийг олгохын өмнө компанийн ослын мөрдөн шалгалтын анхны дүгнэлтийг хянасан гэж тайлбарласан байна.
Starship-ийн зорилго ба ирээдүй
Энэ удаагийн нислэгийн гол зорилго нь Дэлхийг тойрон бараг бүтэн нэг эргэлт хийн, Энэтхэгийн далай дээр дахин орж, шүрших туршилт хийх байв. Тэр ч утгаараа SpaceX-ийн дараагийн шатны газарт буулгах туршилтын урьдал алхам гэж тооцогдож байсан юм.
