Бөх сонирхогчдын дунд “Яруухан бөх” нэрээрээ алдаршсан улсын заан М.Лхагвагэрэлийн онцлох 8 баримтыг та бүхэндээ хүргэж байна. Тэрээр бага наадам хэмээн нэрлэгддэг Сар шинийн барилдаанд үзүүрлэсэн билээ. Түүнчлэн М.Лхагвагэрэл нь бөхчүүдийн чансааны хоёрдугаарт эрэмбэлэгдэж буй.

1. Мөнхтөрийн Лхагвагэрэл нь Завхан аймгийн Яруу сумын харьяат. 1998 оны дөрөвдүгээр сарын 1-нд төрсөн.
2. Түүний аав Мөнхтөр аймгийн арслан цолтой. Аав шигээ бөх болохыг мөрөөдсөөр үндэсний бөх, чөлөөт бөхөөр 2013 оноос хойш хослуулан барилдаж байгаа. Түүний анхны багш нь улсын начин Б.Адъяахүү.
3. Чөлөөт бөхийн бэлтгэлээ өдгөө гавьяат дасгалжуулагч Б.Баттулгын удирдлагад хийдэг. Монголын чөлөөт бөхийн хүнд жинд хамгийн өндөр амжилт гаргаж яваа тамирчин юм.
4. М.Лхагвагэрэл нь 2017 онд аймгийн харцага, 2018 онд Завхан аймгийн наадамд үзүүрлэн аймгийн заан болсон. 2019 онд цолоо баталсан.
5. Түүнчлэн 2021 оны Бүх цэргийн баяр наадамд түрүүлж, Цэргийн заан болсон. Дараа жил нь дахин түрүүлж, хурцалсан байдаг.
6. Тэрээр цэргийн арслан цолоос 2022 онд улсын заан болсон. Ингэхдээ сумын заан Х.Ерэнбаатар, аймгийн харцага Т.Төгсдөлгөөн, улсын харцага Ш.Уламбаяр, аймгийн арслан У.Береке, улсын харцага Ш.Пүрэвгарьд, улсын гарьд Б.Гончигдамба, улсын харцага Б.Зоригтбаатар нарыг давсан юм.
7. М.Лхагвагэрэл Токио-2020 болон Парис-2024 олимпын наадамд Монгол Улсыг төлөөлөн оролцож байв. Тэрээр нэгэн ярилцлагадаа “Олимпын наадамд хоёр удаа оролцоно гэж зүүдэлж ч байгаагүй" гэж ярьж байсан удаатай.
8. Мөн М.Лхагвагэрэл зургаан жил дараалан чөлөөт бөхийн 125 кг жингийн УАШТ-нд түрүүлж байгаа. Түүнийг бөх сонирхогчид чөлөөт болон үндэсний бөхөөр аль алинаар нь өндөр амжилтад хүрнэ хэмээн бэлгэддэг.