Чихэрлэг ундааны хэрэглээ нь таргалалт, чихрийн шижин, шүд цооролт зэрэг өвчний гол шалтгаан юм. Тиймээс зарим улс орон чихэрлэг ундааны хэрэглээг багасгахын тулд тухайн бүтээгдэхүүнд татвар ногдуулдаг. Дэлхийн 85 гаруй улс чихэрлэг ундаанд татвар ногдуулж, Эрүүл мэндийн сангаа бүрдүүлдэг байна. Манай улсын хувьд ч Эрүүл мэндийн даатгалын сангийн орлогоо нэмэгдүүлэхийн тулд архи, тамхи, чихэрлэг ундаа зэрэг бүтээгдэхүүнд Онцгой албан татвар ногдуулж, уг орлогыг эрүүл мэндийн салбарт чиглүүлэх нь чухал аж.

Дэлхийн эрүүл мэндийн байгууллага улс орнуудыг архи, тамхи, чихэрлэг ундаанд ногдуулах татварыг нэмэгдүүлэхийг уриалжээ. ДЭМБ-ын судалгаагаар эдгээр бүтээгдэхүүнд ногдуулж буй татварын дундаж хэмжээ хангалтгүй, нэмэгдүүлэх шаардлагатай гэж дүгнэсэн байна. Эрүүл мэндэд сөрөг нөлөөтэй бүтээгдэхүүнд татвар ногдуулах нь нийгэмд эерэг үр нөлөө үзүүлж, өвчлөл, төрийн үйлчилгээний зардлыг бууруулах ач холбогдолтой болохыг онцолсон юм.

Дэлхийн улс орнууд чихэрлэг ундаанд татвар ногдуулж, хэрэглээг нь бууруулах бодлого баримталдаг. Тухайлбал, Тайваньд Эрүүл мэндийн даатгалын санг бүрдүүлэхдээ архи, тамхи, чихэрлэг ундааны татвараас орсон орлогыг ашигладаг. Мөн Филиппин, Австрали зэрэг улс орнууд энэ аргачлалыг хэрэгжүүлдэг байна.

Монгол Улсад чихэрлэг ундааны зах зээлийн 88 хувийг дотоодын үйлдвэрлэл эзэлдэг бөгөөд нэг хүнд өдөрт дунджаар 381 мл ундаа ногддог аж. Судалгаагаар хийжүүлсэн ундаа, чихэрлэг хүнсний хэт их хэрэглээ нь хүүхдийн сэтгэцийн эрүүл мэндэд сөргөөр нөлөөлж, нойрны хэмнэл алдагдах, сэтгэн бодох чадвар буурах, ой тогтоолт муудах зэрэг үр дагаварт хүргэдэг болохыг тогтоожээ. Түүнчлэн өнгөрсөн жилийн эрт илрүүлэгт хамрагдсан хүүхдүүдийн 67 хувь нь шүд цоорох өвчтэй байсан нь чихэрлэг хүнсний бүтээгдэхүүн, хийжүүлсэн ундааны хэрэглээтэй шууд холбоотой юм.