Цагдаагийн байгууллагаас М-Си-Эс группийн эрх бүхий албан тушаалтнуудыг баривчилсан мэдээлэл өчигдөр гарсан. Ямар үндэслэлээр хувийн хэвшлийн байгууллагын ажилтныг баривчилсан асуудлыг Хууль зүй, дотоод хэргийн сайд О.Алтангэрэл тодруулга мэдээлэл өглөө.

Тэрээр "Нэр бүхий хүмүүс саатуулагдсан нь үнэн. Монгол Улсын төр, хууль хяналтын байгууллагууд хуульд заасан үндэслэлийн дагуу гүйцэтгэх ажиллагаа буюу тусгай ажиллагаа явуулдаг. Энэ нь монгол хүний эрх, эрх чөлөөг хамгаалах, монгол төр, үндэсний аюулгүй байдлыг хамгаалах зорилготой байдаг. Гэтэл хувийн аж ахуй нэгж, хууль бусаар гүйцэтгэх ажиллагаа явуулсан, төрийн нууцыг хууль бусаар олж авсан. Өөрөөр хэлбэл, хувийн аж ахуй нэгж дэргэдээ тусгай байгууллагатай байсан зүйлүүд яригдаж байна. Энэ асуудалд сэжиглэгдсэн тодорхой этгээдүүдийг саатуулж, шалгагдаж байна.

Монгол Улсад ямар ч мөнгөтэй, том байлаа гээд хувийн аж ахуйн нэгж гүйцэтгэх ажиллагаа явуулж болохгүй. Төрийн нууц хуулиар хамгаалагдана. Хэн ч монгол төрийн хуулийн дээгүүр гарч, гүйцэтгэх ажиллагаа явуулж болохгүй. Гүйцэтгэх ажлын тусгай техник хэрэгсэл ашиглаж болохгүй. Энэ зарчмын хүрээнд мөрдөн шалгах үйл ажиллагаа явуулж байна. Төрийн нууц, мөрдөн байцаалтын нууцтай холбоотой асуудлыг дэлгэрэнгүй ярих боломжгүй" гэлээ.