Залуучуудын хөгжлийг дэмжих тухай хуульд шинэчлэл хийхээр Ажлын хэсэг ажиллаж байна. Тухайлбал, 35 хүртэлх насны залуусын аж ахуй эрхлэлтэд татварын дэмжлэг үзүүлэх, залуу гэр бүлүүдийн орон сууцны асуудлыг шийдвэрлэх талаар судалж байгаа аж. Энэ талаар УИХ-ын гишүүн М.Ганхүлэг мэдээлэл хүргэлээ.

УИХ-ын гишүүн М.Ганхүлэг “Залуучуудын хөгжлийг дэмжих тухай хуулийн Ажлын хэсэг хагас жилийн хугацаанд судалгаа хийж, хуулийн хэрэгжилтийг дүгнэх ажлыг 11 гишүүний хамтаар зохион байгууллаа. Үүнтэй холбоотойгоор хэд хэдэн удаагийн хурал хийж, олон улсын байгууллагын мэргэжилтнүүдтэй уулзсан юм.

Ирэх хаврын болон намрын чуулганаар хуулийн төслийг сайжруулж, залуучуудын хөгжлийг дэмжих хэд хэдэн чухал асуудлыг шийдвэрлэхээр ажиллаж байна. Тухайлбал, орон сууцны реформын хүрээнд залуу гэр бүлүүдийн орон сууцанд хамрагдах боломжийг нэмэгдүүлэхийн тулд Япон, Америкийн туршлагыг судалж байгаа. Мөн орон нутаг, сумдад залуу гэр бүлүүдийн орон сууцны хүртээмжийг нэмэгдүүлэх заалтуудыг тусгахаар ажиллаж байна.

Үүнээс гадна 35 хүртэлх насны залуус шинэ компани байгуулан, үйл ажиллагаа явуулахад татварын болон санхүүгийн дэмжлэг үзүүлэх асуудлыг хэлэлцэж байгаа юм. 2017 онд батлагдсан хуулийг шинэчлэх хүрээнд иргэдээс санал авч, хаврын чуулганд дүгнэлтээ танилцуулсны дараа намрын чуулганд шинэ хувилбарыг өргөн барихаар төлөвлөж байна" гэлээ.