Засгийн газрын хуралдаанаар Ж.Батзанданг Стратегийн ач холбогдол бүхий ашигт малтмалын ордын тусгай зөвшөөрөл эзэмшиж байгаа хуулийн этгээдтэй хэлэлцээ хийх Засгийн газрын Бүрэн эрхт төлөөлөгчөөр томилсон. Тэгвэл шинэ ажилд томилогдоод удаагүй байгаа Засгийн газрын бүрэн эрхт төлөөлөгч Ж.Батзандантай цөөн хором ярилцлаа.

-Та Засгийн газрын БЭТ-өөр томилогдлоо. Яг ямар чиг үүрэгтэй албан тушаал вэ?

-2019 оны Үндсэн хуулийн нэмэлт өөрчлөлтөд газрын хэвлийн баялгийн дийлэнх нь Монголын ард түмэнд оногдох зарчмаар Баялгийн сангаар дамжуулж тэгш, шударга хүртээмжтэй хуваарилна гэж заасан. Мөн өнгөрсөн оны дөрөвдүгээр сард Үндэсний баялгийн сангийн тухай хуулийг баталсан. Энэ хуулиар монголын ард түмэн Хуримтлалын, Ирээдүй өв сан, Хөгжлийн сантай болсон. Эдгээр сангийн хөрөнгийг хаанаас бүрдүүлэхийг хуульд маш тодорхой тусгасан. Тодруулбал, Үндэсний баялгийн сангийн тухай хуульд ашигт малтмалын ордуудын АМНАТ болон стратегийн ордуудын 50 хүртэлх хувиас бүрдэнэ гэж заасан. Хувийн хөрөнгөөр хайгуул хийж тогтоосон стратегийн ордын 34, улсын хөрөнгөөр хайгуул хийсэн бол 50 хүртэлх хувийг төр эзэмшинэ. 34, 50 хувьд оногдох ногдол ашиг Баялгийн сан руу орно гэсэн үг юм.

Өнөөдрийн байдлаар Монгол Улсад стратегийн 16 орд байна. Цаашдаа стратегийн ордод оруулах 50 гаруй орд байгаа. Эдгээр ордыг Засгийн газар, Уул уурхайн яам тодорхой болгоод гаргасан шийдвэрүүдээ Засгийн газрын бүрэн эрхт төлөөлөгч рүү өгөх юм. Нэг үгээр, энэ стратегийн орд газрыг эзэмшиж байгаа аж ахуйн нэгж газруудтай хэлцэл хийх эрхийг Бүрэн эрхт төлөөлөгчид өгсөн гэсэн үг. Миний бие “Эрдэнэс Монгол” компани дээр оффис аваад ажилдаа орж байна. ЗГ-ын дэргэд том ажлын хэсгүүд байгуулж байна. Энэ ажлын хэсгүүд судалгааныхаа ажлыг нарийвчлан хийгээд мэргэжлийн байгууллагууд, судлаачид, зөвлөх үйлчилгээний байгууллагуудтай хамтраад судалгааны ажил хийнэ.