Монгол Улс энэ онд Хятад руу экспортлох нүүрсний хэмжээгээ бараг тавны нэгээр нэмэгдүүлэхээр зорьж байгаа бөгөөд байгалийн баялаг ихтэй тус улс хөрштэйгөө эрчим хүчний хамтын ажиллагаагаа өргөжүүлэхийг эрмэлзэж байна. Энэ хүрээнд 2025 оны хоёрдугаар сарын 14-ний өдөр Гашуунсухайт-Ганцмод боомтын хил дамнасан төмөр замыг холбох Монгол Улсын Засгийн газар, БНХАУ-ын Засгийн газар хоорондын хэлэлцээрт талууд гарын үсэг зурлаа. Төмөр замын барилгын ажлыг 2025 оны дөрөвдүгээр сард эхлүүлж, хоёр жил хагасын дотор дуусгахаар төлөвлөж байгаа юм.
Шинэ төмөр зам Монгол Улсын нүүрсний экспортын хүчин чадлыг нэмэгдүүлж, хамгийн том худалдааны түнш болох Хятадтай эдийн засгийн хамтын ажиллагааг гүнзгийрүүлэхэд чухал үүрэг гүйцэтгэнэ. Мөн уг хэлэлцээр Монгол Улс дэд бүтцээ сайжруулж, хөрш орнуудтайгаа эдийн засгийн уялдаа холбоогоо нэмэгдүүлэхийг зорьж байгаагийн нэг илрэл юм.
Дэлхийн хэвлэл мэдээллийн хэрэгслүүд уг төмөр замын холболтын төслийг Монгол Улсын эдийн засгийг өсгөх, Хятадтай эдийн засгийн хамтын ажиллагаагаа өргөжүүлэх стратегийн чухал алхам гэж үзэж байна.
Монгол Улсын Ерөнхий сайд Л.Оюун-Эрдэнэ даваа гарагт өгсөн ярилцлагадаа ган болон эрчим хүч үйлдвэрлэх нүүрсний экспорт энэ онд 100 сая тоннд хүрнэ гэж тооцоолж буйгаа мэдэгдэв. Өнгөрсөн баасан гарагт Монгол, Хятадын гарын үсэг зурсан хил дамнасан төмөр замын холболтын гэрээний үр дүнд экспортын тээвэрлэх хүчин чадал 30 сая тонноор нэмэгдэх юм.
Тус холболт нь Л.Оюун-Эрдэнийн байгуулахаар зорьж буй хэд хэдэн төмөр замын холболтуудын нэг бөгөөд үүний үр дүнд Монгол Улс жилд 165 сая тонн нүүрс экспортлох хүчин чадалтай болох юм. Энэ нь өнгөрсөн жилийн 84 сая тонн экспортыг бараг хоёр дахин нэмэгдүүлсэн үзүүлэлт болно. Мөн тэрээр Хятад болон бусад улсуудтай ногоон эрчим хүчний үйлдвэрлэл, устөрөгчийн үйлдвэрлэл, байгалийн хийн дамжуулалт зэрэг эрчим хүчний салбарт хамтран ажиллах сонирхолтой байгаагаа илэрхийлжээ.
"Монгол Улс эрчим хүч үйлдвэрлэх өргөн уудам газар нутагтай" гэж Л.Оюун-Эрдэнэ онцлоод "Бид эрчим хүчээ Хятад болон Азийн бусад томоохон гүрнүүдэд борлуулах боломжтой" гэжээ.
Мөн Монголын Засгийн газар байгалийн хийн үнийн тохиролцооны улмаас гацсан "Сибирийн хүч 2" хийн хоолойн төслийн асуудлаар Хятад, Орос улстай гурван талт хэлэлцээ хийхээр төлөвлөж байна. Гэрээ хэлцэл амжилттай болбол Монгол Улс уг төслийг урагшлуулахад бэлэн байна гэж Ерөнхий сайд хэллээ.
Тэрээр Хятадын Төрийн зөвлөлийн Ерөнхий сайд Ли Цянтай уулзахдаа Улаанбаатарт гурван талт уулзалт зохион байгуулахыг санал болгосон бөгөөд үүний өмнө ОХУ-ын Ерөнхийлөгч Владимир Путинтай энэ талаар ярилцжээ. "Орос, Хятадын төрийн өмчит компаниуд хооронд худалдан авах гэрээ байгуулсны дараа Монголын Засгийн газар энэхүү төсөлд гарын үсэг зурж, урагшлуулахад бэлэн байна" гэж мэдэгджээ.
Түүнчлэн Монгол Улс нүүрсний нөөцөө ашиглан устөрөгч үйлдвэрлэж, үүнийг гангийн үйлдвэр зэрэг хүнд аж үйлдвэрүүдэд ирээдүйн түлш болгон ашиглах сонирхолтой байгааг онцолжээ. Л.Оюун-Эрдэнийн хэлснээр, Монгол Улс Ойрхи Дорнодын улс орнуудтай устөрөгч экспортлох талаар хэлэлцээ хийж байгаа аж.
Эх сурвалж: Bloomberg, Reuters
