Монголын Бодибилдинг фитнесийн хөгжлийн холбооноос 2024 оны долоодугаар сарын 5-8-ны хооронд зохион байгуулагдсан ААШТ-д оролцсон тамирчдын допингийн шинжилгээний хариуг танилцуулсан билээ. Үүнээс дөрвөн тамирчны шинжилгээний хариу эерэг буюу хориотой бодис хэрэглэсэн гэж гарсан талаар зарласан. Эдгээр тамирчдын нэг болох МУГТ Б.Сугарсүрэн мэдэгдэлтэй холбогдуулан мэдээлэл хийлээ.
МУГТ Б.Сугарсүрэн: Допингийн шинжилгээг ААШТ-ий үеэр авсан. Би энэ шинжилгээний хариу гараагүй байхад буюу зургаан сарын дараа Дэлхий аваргын тэмжээнд оролцсон. Ингээд Монгол Улсаас анхны дэлхийн аварга болсон. Допингийн шинжилгээний хариугаа удаа дараа нэхэхэд надад өгөөгүй. Яагаад албан бичгээр болон мейлээр түрүүлж мэдэгдээгүй вэ. Одоо хүртэл надад допингийн шинжилгээний газраас мэдэгдэл өгөөгүй байна. Тамирчинтай уулзаж шинжилгээний хариуг нь танилцуулаагүй байж ингэж зарлаж болж байгаа юм уу. Үнэхээр допин илэрсэн бол А биш Б шинжилгээгээ өгөх хугацаа яагаад өгөөгүй вэ.
Монголын Бодибилдинг фитнесийн хөгжлийн холбоо Монгол Улсын Ерөнхийлөгчийн дасгалжуулагч Ш.Амарсайхан гэдэг хүний тоглолтоор сүүлийн гурван жил явж байгаа. Энэ хүн нарийн бичгийн дарга, гадаад харилцаа хариуцсан менежер, дасгалжуулагч гээд өөрийн дөрвөн шавьдаа албан тушаал хариуцуулсан. Бидэнд ямар ч эрх мэдэл байдаггүй. Залуус ерөөсөө дуугардаггүй. Гавьяат тамирчин болохоор би ганцаараа дуугарахаар намайг байнга дардаг.
Манай холбооны Ерөнхийлөгч Ш.Амарсайхан өөрийн тойрон хүрээлэгч дунд нэр хүндээ алдсан. Оруулахгүй гэж байсан тамирчин нь ДАШТ-д ороод, Дэлхийн аварга болчихлоо гэсэн яриа гарахад өөрийнхөө нэрийг цэвэрлэхийн тулд надаар туг тахиж намайг допингтой гэх яриа гаргасан. Ш.Амарсайхан та 2021 оны улсын аваргаар мистер болохдоо допинг хэрэглэсэн нь тогтоогдож, дөрвөн жилээр эрхээ хасуулсан тамирчин хүн шүү дээ. Энэ хүн өөрийнх нь талын хүн байвал допинг илэрсэн ч нууж байгаад тэмцээнд явуулдаг.
