Гашуунсухайт-Ганцмод боомтын хил дамнасан төмөр замыг холбох Монгол Улсын Засгийн газар, БНХАУ-ын Засгийн газар хоорондын хэлэлцээрт талууд өчигдөр гарын үсэг зурав.

Холбогдо байнгын хороод бүтээн байгуулалтын гэрээнд гарын үсэг зурах эрхийг Засгийн газарт өгч, гэрээнд оруулах шаардлагатай саналуудыг хэлсэн. Тэгвэл Засгийн газрын хуралдаанаар УИХ-ын гишүүдийн хэлсэн саналыг тусгасан талаар Аж үйлдвэр эрдэс баялгийн сайд Ц.Туваан, Зам тээвэр хөгжлийн сайд Б.Дэлгэрсайхан нар мэдээлсэн юм.

Талууд бүтээн байгуулалтын гэрээнд гарын үсэг зурсан учраас одоо тус гэрээг манай УИХ соёрхон батлах ёстой. Хаврын ээлжит чуулган эхэлмэгц Гашуунсухайт-Ганцмод боомтын хил дамнасан төмөр замыг холбох гэрээг соёрхон батална.

Энэ төсөл 2004 оноос эхлэн яригдаж, 2008 оноос хойш 17 жилийн хугацаанд нийт 60 гаруй удаагийн яриа хэлэлцээ хийгдэж, Үндэсний аюулгүй байдлын зөвлөлийн гурван зөвлөмж, УИХ-ын зургаа, Засгийн газрын 45 тогтоол гарсны эцэст талууд гарын үсэг зурлаа.