Ардчилсан намын гишүүд, дэмжигчдийн холбооны тэргүүн Т.Хасбаатар өнөөдөр /2025.02.13-нд/ Ардчилсан намын Удирдах зөвлөлөөс гаргасан мэдэгдлийг танилцууллаа. Тус зөвлөлөөс АН-ын одоогийн дарга Л.Гантөмөрийг өнөөдөрөөс эхлэн АН-ын гишүүнээс хөөх шийдвэр гаргасан байна.
АН-ын гишүүд, дэмжигчдийн холбооны тэргүүн Т.Хасбаатар: "Монгол Улс ардчилсан чөлөөт сонгуулийг эрхэмлэдэг Үндсэн хуультай. 2016 оноос хойш Монгол Улсад нэг нам дангаар засаглаж, нийгэм эдийн засгийн асар олон хохирлыг Монголын ард түмэнд учруулсан. Сөрөг хүчингүй 10 гаруй жил явсан. Сая 2024 онд иргэд, сонгогчдын зүгээс хүчтэй сөрөг хүчин байж, ард түмэндээ шударга ёсыг бэхжүүлэхийн төлөө ажиллаасай гэж саналаа Ардчилсан намд өгсөн.
Гэтэл Л.Гантөмөр гэж этгээд Шадар сайд хэмээх өндөр албан тушаалд очоод Ардчилсан намыг бүхэлд нь МАН-ын халаасны нам болгосон. Ардчилсан намын тамга бол МАН-ын дарга Л.Оюун-Эрдэнийн сейфэнд хадгалаастай байгаа. Тиймээс Л.Гантөмөр нь Ардчилсан намын дүрэм болоод үнэт зүйл, бодлого, үзэл санаанаасаа урвасан хүн болж байна. Л.Гантөмөр Ардчилсан намын үзэл санаа, үнэт зүйлийг цаашид авч явах чадваргүй болсон. Иймд, Л.Оюун-Эрдэнэ Л.Гантөмөрөө албан ёсоор намдаа ав. Би Л.Оюун-Эрдэнийг танина, утастаж хэлнэ.
Иймд Ардчилсан намын 80 гаруй мянган гишүүн цахим саналд нэгдэж Л.Гантөмөрийг Ардчилсан намаас хөөх шийдвэрийг гаргасан юм. АН-ын шат шатны байгууллагууд энэ шийдвэрийг хэрэгжүүлж ажиллахыг хүсье. Дараагийн сонгууль хүртэл АН сөрөг хүчний үүргээ биелүүлээд явна.
АН бол баруун төвийн үзэл баримтлалтай нам. Энэ үзэл санаандаа бат байж, бодлогоо хэрэгжүүлэх ёстой. Олон улсын практикт зүүний, барууны намууд нэгдэж, Засгийн газраа байгуулсан явдал байдаггүй. Барууны ижил төстэй, зүүний ижил төстэй намууд Хамтарсан засаг байгуулж ажилладаг. Зүүний, барууны гэдэг чинь гал, ус хоёр нийлсэнтэй агаар нэг. Тэгэхээр хамтарч ажиллах ямар ч боломжгүй.
Улс төрийн намын тухай хууль хэрэгжиж эхлэх байсан ч дарга нар эрх мэдэлтэй болоод өөрсдийгөө тойглон хамгаалахын тулд хойшлууллаа. Одоо нэн яаралтай АН Их хурлаа зарлаж, шинэ намын даргаа тодруулах хэрэгтэй. Энэ нам ард түмний талд байж, сөрөг хүчний үүргээ биелүүлэх нь дараагийн улс төрийн сонгуульд болоод Монголд ардчиллын үзэл санааг хөгжүүлэх ёстой юм " гэлээ.
