Өнгөрсөн сарын байдлаар татварын асуудалтай холбоотой 110 мянга гаруй санал иржээ. Иргэд болон ААН-үүд нийгмийн даатгалын шимтгэлийг бууруулах асуудлыг хамгийн их хөндсөн байна. Татварын багц хуулийг боловсруулах Ажлын хэсгийн ахлагчаар ажиллаж байгаа УИХ-ын гишүүн Х.Ганхуяг НДШ-ийг хэрхэн хөнгөлөх, чөлөөлөх вэ гэдэг асуудлаар дараах байр суурийг өнөөдөр илэрхийллээ.

Тэрээр "Иргэд 10 сая ба түүнээс дээш төгрөгийн цалинтай байвал 40-46 хувийн татвар төлж байгаа (НДШ оруулаад). Гэтэл 10 сая төгрөгийн цалин гэдэг нь тухайн бизнесийн эздийн цалин биш. Харин байгууллагынхаа хамгийн өндөр ур чадвартай ажилтнуудын авдаг цалин юм. Эдгээр хүмүүсээс 40-46 хувийн татвар авдаг байна. Тэгэхээр 10 сая төгрөгийн цалинтай хүн татвар, нийгмийн даатгалын шимтгэлээ төлөөд цаана нь 5 сая төгрөгтэй л үлддэг. Иймээс эдгээр хүмүүс гадаад руу явахаар шийдэж байгаа юм.

Жишээлбэл, 1 сая 500 мянган төгрөгийн цалинтай хүн байлаа гэж бодъё. Тэд мөн адил 30-36 хувийн татвар, төлж байна. Тэгвэл ААН-ийг үүнтэй харьцуулж үзье. ААН 1.5 тэрбум төгрөгийн борлуулалтын орлоготой байлаа гэж бодоход Аж ахуйн нэгжийн орлогын албан татварт нэг хувийг л төлдөг. ААН-ийн эзэн ашгаа авахад үүнээс нь татвар төлнө, мөн НДШ гэж суутгадаггүй. Гэтэл 1 сая 500 мянган төгрөгийн цалинтай хүн татвараа ч төлж, нийгмийн даатгалын шимтгэлээ ч төлөөд гар дээрээ сая төгрөг л авч байна. Олон улсын практикт, эдийн засаг, төсвийн хувьд хүнд байдалтай тохиолдолд л хувь хүнээс татвар, НДШ авч эхэлдэг. Ихэнх орнууд тодорхой түвшин тогтоож, орлогын албан татвараас чөлөөлдөг. Жишээ нь, дундаж орлоготой, эсвэл 1-2 сая хүртэлх цалинтай хүнээс хүн амын орлогын албан татвар авахгүй. Харин үүнээс дээш байвал 10 хувь ч юм уу авна гэх зарчмаар явдаг.

Бид энэхүү зарчмын дагуу өөрсдийн саналыг өгсөн байгаа. Энэ тал дээр шинэчлэл хийх хэрэгтэй гэж бодож байна" гэлээ.