Улсын дээд шүүх өчигдөр буюу хуульд заасан хугацаандаа багтаан Хөгжлийн банкны шүүхийн шийдвэрийг албажуулжээ. Өнгөрсөн оны арванхоёрдугаар сарын 11-нд Улсын дээд шүүхээс Хөгжлийн банкны 80 хүн, 4 хуулийн этгээд холбогдох хэргийг шийдвэрлэж, Анхан шатны шүүхийн шийдвэрийг хэвээр үлдээсэн. Тус шийдвэрээр УИХ-ын гишүүн Д.Цогтбаатарыг Хөгжлийн банкны хэргээр ял шийтгэсэн анхан шатны шүүхийн шийдвэрийг хэвээр үлдээсэн юм. Ингэснээр УИХ-ын гишүүн Д.Цогтбаатарын бүрэн эрхийн асуудал хөндөгдөж байгаа ч УИХ шүүхийн шийдвэрийг албажиж гартал шийдвэр гаргахгүй хэмээн хоёр сарын хугацаа өнгөрөөгөөд байгаа юм. Уг нь жирийн иргэн шүүгч шийдвэрээ танилцуулж, алх цохисноос хойш хэрэгжүүлдэг бол УИХ-ын гишүүн шүүхийн шийдвэр албажиж иртэл шийдвэрийг хэрэгжүүлэхгүй байгаа. Тэгвэл УИХ-ын шаардаад байсан шүүхийн шийдвэр өчигдөр албажиж гарсан байна. Нэгэнт Улсын дээд шүүхээс гэм буруутайд тооцож, ял шийтгэл авсан УИХ-ын гишүүний бүрэн эрхийг түдгэлзүүлэх хуультай. Харин УИХ Д.Цогтбаатар гишүүний асуудлыг хэрхэн шийдвэрлэх нь тодорхой бус байгаа юм. Монгол Улсын хүчин төгөлдөр мөрдөгдөж байгаа хуулиар шүүхийн шийдвэр эцсийнх байна. Тиймээс УИХ шүүхийн шийдвэрийг хэлэлцэх бус хэрэгжүүлэх үүрэгтэй. Бүрэн эрх нь хэрэгжиж байгаа УИХ-ын гишүүн шүүхээс ял авсан анхны тохиолдол энэ болж байна. УИХ-ын гишүүн Д.Цогтбаатар хэрэг хийсэн, эсэх шүүхийн эцсийн шийдвэр гараагүй байхад УИХ-ийн гишүүнээр сонгогдсон.
