Засгийн газрын ээлжит хуралдаанаас гаргасан шийдвэрийн талаар холбогдох сайд нар мэдээлэл хийлээ. Өнөөдрийн хэвлэлийн хуралд Аж үйлдвэр, эрдэс баялгийн сайд Ц.Туваан, Зам тээвэр хөгжлийн сайд Б.Дэлгэрсайхан нар оролцож Гашуунсухайт-Ганцмодны боомтын төмөр замын хил холболтын гэрээг үзэглэх талаар мэдээлэл өглөө.

Өнөөдрийн хуралдаанаар Гашуунсухайт-Ганцмодны төмөр замын хил холболтын асуудлаар шийдвэр гаргажээ. Хоёр улсын Ерөнхий сайд нарын уулзалтаар буюу хоёрдугаар сарын 14-нд төмөр замын хил холболтын гэрээг албан ёсоор зурах юм.

Зам тээвэр хөгжлийн сайд Б.Дэлгэрсайхан: УИХ-ын гишүүдээс өгсөн саналыг гэрээнд тусгаж, сайжруулсан. Тухайлбал, Ганцмод-Гашуунсухайтын төмөр замын барилгын ажил эхлэхэд бүх боомтын боомтын холболтыг давхар шийдэхээр болсон. Мөн харьяа яамд өөрт хамаарах гэрээг хийнэ. Тухайлбал, манай яам хил дамнасан төмөр замын бүтээн байгуулалтыг нэг компаниар хийлгэх үү, сонгон шалгаруулалт зарлах уу гэдгийг урд хөрштэйгөө ярьж шийднэ. Хил дамнасан бүтээн байгуулалтын ажил нэг ажил учраас нэг компани хийх нь илүү ач холбогдолтой гэж үзэж байгаа. Гэсэн хэдий ч Монгол Улсын хуулийн дагуу тендер зарлаж, үнэ өртгийг хямдруулахыг нарийвчилсан гэрээнд тусгана.

Мөн өнөөдрийн Засгийн газрын хуралдаанаар Багахангайн өртөөнөөс Хөшигтийн хөндий рүү салаа зам тавих шийдвэр гаргалаа. Ингэснээр Улаанбаатарт орж ирдэг чингэлэг тээвэр болон ачаа барааг гаргаж Хөшигтийн хөндийд төвлөрүүлэх боломж бүрдэж байна.

Хил холболтын төмөр замын санхүүжилтийг Эрдэнэс Тавантолгой бэлнээр хийнэ. Өөрөөр хэлбэл, ямар нэгэн бартерын гэрээ хийхгүй. Энэ санхүүжилтийг хийлээ гээд иргэдэд оногдох ногдол ашигт нөлөөлөхгүй.

Аж үйлдвэр, эрдэс баялгийн сайд Ц.Туваан: Хоёр улсын Засгийн газрын ажлын хэсгийн 60 удаагийн уулзалтын дүнд шийдвэрлэсэн асуудлыг хоёр улсын Ерөнхий сайд нарын уулзалтаар мөн зурна. Энэ гэрээг УИХ-аар соёрхон батална. Үүний дараа компани хоорондын гэрээг зурна. Гэрээнд гарын үсэг зурах эрхийг УИХ-ын холбогдох байнгын хороодын хуралдаанаар Б.Дэлгэрсайхан сайд бид хоёрт өгсөн. Энэ хуралдаан дээр гэрээг сайжруулах саналыг УИХ-ын гишүүдээс өгсөн. Тухайлбал, сэргээгдэх эрчим хүчний асуудлаар ойлгомжгүй заалт байна гэсэн. Үүнийг хэлэлцээр дээр сэргээгдэх эрчим хүчний салбарт хамтарч ажиллах гэж засаж оруулсан.

Түүнчлэн гурвыг цогцоор буюу нүүрс худалдах худалдан авах, уурхайн хүчин чадлыг нэмэгдүүлэх, төмөр замын бүтээн байгуулалт гэсэн гурван төсөл гэрээнд гарын үсэг зурмагц зэрэг хэрэгжинэ. Уурхайн хүчин чадлыг нэмэгдүүлэхэд БНХАУ-ын компаниудад таатай нөхцөл олгосон байна гэдгийг залруулаад харилцан ашигтай хуулийн дагуу ажиллах өөрчлөлтүүдийг хийсэн.