Монгол Улс өнгөрсөн жил зээлжих зэрэглэлээ ахиулснаас хойш анх удаа ам.долларын бонд гаргахаар төлөвлөж байгаагаа зарлалаа. Энэ хүрээнд ирэх онуудад хугацаа нь дуусах хоёр бондоо буцаан худалдан авах тендерийн санал зарлаж, үүнийгээ санхүүжүүлэхийн тулд олон улсын зах зээлд шинэ бонд гаргахаар болжээ.

Тодруулбал, тус бондыг хоёрдугаар сарын 10-ны өдрөөс олон улсын хөрөнгө оруулагчдад санал болгож эхлэх аж. Бондын хэлцлийг “Credit Agricole”, “Deutsche Bank”, “HSBC” болон “JPMorgan” банк гүйцэтгэхээр болжээ. Мөн дахин санхүүжүүлэлт хийх шинэ бондын үнийг хоёрдугаар сарын 18-наас хойш тогтоохоор байна.

Монгол Улс ирэх оны дөрөвдүгээр сард төлөх ёстой 566 сая ам.долларын “Номад” бонд, 2028 оны нэгдүгээр сард дуусгавар болох 650 сая ам.долларын “Хүннү” бондыг эргүүлэн худалдаж авах тендер зарлалаа. Ингэснээр нийт 1.2 тэрбум ам.долларын бондын өрийг хугацаанаас нь өмнө төлөх санал гаргаж байгаа гэсэн үг юм.

Эдгээр бондууд зах зээл дээр гаргасан үнээсээ дээгүүр арилжаалагдаж байгаа аж. Энэ талаар “Bloomberg" мэдээлсний дараа олон улсын зах зээлд арилжаалагдаж буй Монгол Улсын Засгийн газрын бондуудын ханш эрс өсөж, хөгжиж буй орнуудын ам.долларын бондуудыг өсөлтөөрөө тэргүүлж эхлэв.