ЧИНГЭЛТЭЙ ДҮҮРЭГ “ДУЛААЛЪЯ” АЯНЫГ ЭХЛҮҮЛЛЭЭ
Нийслэлийн Чингэлтэй дүүргээс хэрэгжүүлж байгаа “Дулаалъя” аяны хүрээнд гэр хорооллын бүсийн айл өрхүүдийн байшингийн дулаан алдагдлыг инженер, мэргэжилтнүүдтэй хамтран тусгай төхөөрөмжөөр нарийн хэмжиж эхэллээ.
Ийнхүү дулаан алдагдлыг нарийн хэмжих, тухайн барилгад хаана нь ямар асуудал байна вэ гэдэг дата судалгааг цуглуулах ажил цагаан сараас өмнө дуусна гэлээ. Аяны гол зорилго нь өвлийн эд хүйтний үеийг ашиглан эдгээр дата мэдээллээ нэгтгэж ирэх дулааны улирлуудад дүүргийн зүгээс иргэддээ байшин, гэрээ хэрхэн зөв, үр дүнтэй, хямд зардлаар дулаалах тал дээр нь мэргэжлийн хүмүүстэй хамтарч зөвлөн туслах юм байна.
Гэр хорооллын бүсийн айл өрхүүд дулаан алдалтаа бүрэн шийдэж чадвал агаарын бохирдол болон түлш, цахилгааны зардлаа байшингийнхаа онцлогоос хамаараад 40-65 хувь бууруулна гэх тооцоог мэргэжилтнүүд гаргажээ.
Дулаалъя аяны эхний ажил хэрэгжсэнээр айлуудад дараагийн өвөлдөө бэлтгэлтэй орох, тэдэнд гэр, байшингаа дулаалах сэдлийг бий болгох, энэ чиглэлийн мэргэжлийн хүмүүсийн мэдлэг зөвлөгөөг айл өрх бүрд хүргэх боломжийг бүрдүүлж өгөх аж.
