Хятад улс АНУ-ын импортын бараанд гаалийн татвар ногдуулж, тус улсын хэд хэдэн компани, тэр дундаа Google-д хориг арга хэмжээ авах тухай мэдэгдэл хүргүүлсэн нь Ерөнхийлөгч Дональд Трампын Хятадын импортын бараа бүтээгдэхүүнд ногдуулсан өндөр татварын хариу арга хэмжээ болж байна.
Трамп долоо хоногийн сүүлээр БНХАУ-ын дарга Ши Жиньпинтэй ярилцахаар төлөвлөж байна гэж Цагаан ордны хэвлэлийн төлөөлөгч мэдээлжээ.
Трамп ням гарагт Европын холбооны бараа бүтээгдэхүүнд татвар ногдуулна гэж мэдэгдсэн. Трампын гаалийн татвар хэрэгжиж эхлэхтэй зэрэгцэн Хятадын шинэ арга хэмжээнд АНУ-ын нүүрс болон шингэрүүлсэн байгалийн хийн бүтээгдэхүүнд 15, түүхий нефть, хөдөө аж ахуйн тоног төхөөрөмж, ачааны машин, мөн АНУ-аас Хятад руу экпортолдог том хөдөлгүүртэй седан машинд 10 хувийн татвар ногдуулах зэрэг багтаж байна.
ЗАРИМ МЕТАЛЛЫН ЭКСПОРТЫН ХЯНАЛТ
Хятад улс цахилгаан бараа, цэргийн техник, нарны зайн хавтангуудад чухал ач холбогдолтой гянт болд зэрэг зарим металлд экспортын хяналт тавьж байна гэж мэдэгдэв. Хятад улс АНУ-аас импортолсон цахилгаан ачааны машинд 10 хувийн татвар ногдуулахаар төлөвлөж буй бөгөөд үүнд Теслагийн Хятадад сурталчилж буй “Cybertruck” машин ч багтах аж.
Хятадын шинэ тариф энэ сарын 10-наас хүчин төгөлдөр болохоор байна. Трамп Хятадтай хоёр жил үргэлжилсэн худалдааны дайныг эхлүүлж, дэлхийн эдийн засагт хохирол учруулж байна гэж шинжээчид анхааруулж байна.
“Oxford Economics” Хятадын эдийн засгийн өсөлтийн таамаглалыг бууруулж, "Худалдааны дайн эхний шатандаа байгаа тул цаашид тариф ногдуулах магадлал өндөр байна" гэж тэмдэглэжээ. Хэрэв Бээжин үхлийн аюултай опиоид болох фентанилыг АНУ руу нэвтрүүлэхээ зогсоохгүй бол Хятадад ногдуулах гаалийн татвараа нэмж магадгүй гэж Трамп мэдэгдсэн.
Хятад улс фентанил бол Америкийн асуудал хэмээгээд, Дэлхийн худалдааны байгууллагад гаалийн татварыг эсэргүүцэж, бусад хариу арга хэмжээ авахаа мэдэгдээд, яриа хэлэлцээ хийх үүд хаалгыг нээлттэй үлдээж буйгаа онцолсон. Хятадын LNG импортын ердөө тав гаруй хувийг АНУ-аас авдаг. Хятадын хариу арга хэмжээ авсны дараа ам.долларын ханш чангарч, Хятадын юань, евро, Австрали, Канадын доллар, Мексикийн песогийн ханш унасан нь дэлхийн худалдааны дайн сунжирч болзошгүй гэсэн зах зээлийн түгшүүрийг илэрхийлж буйг эдийн засагчид онцолжээ.
Ахлах эдийн засагч Гари Нг "Хоёр улс (АНУ, Хятад) зарим асуудлаар тохиролцож чадсан ч тарифыг тогтмол арга хэрэгсэл болгон ашиглаж байгаа нь зах зээлийн тогтворгүй байдлын гол эх үүсвэр болж магадгүй юм" гэжээ.
Канадын Ерөнхий сайд Жастин Трюдо, Мексикийн Ерөнхийлөгч Клаудиа Шейнбаум нар мягмар гарагаас эхлэн хүчин төгөлдөр болох 25 хувийн тарифыг 30 хоногийн турш түр зогсоож, хилийн хэрэгжилтийг сайжруулахаар тохиролцсон.
