Оросын түрэмгийллийн эсрэг тусгай шүүх байгуулах ажил гурван жил үргэлжилж байгаа ч дорвитой үр дүнд хүрээгүй байна. Үүнтэй холбоотойгоор саяхан Олон улсын хуульчдын холбооны гүйцэтгэх захирал, олон улсын эрх зүйн шинжээч Марк Эллис ОХУ-ын түрэмгийллийн эсрэг тусгай шүүх байгуулахад тулгарч буй сорилтуудын талаар RBC-Ukraine агентлагт ярилцлагаа өгчээ. Тэрээр улс төр, хууль эрх зүйн төвөгтэй байдлаас үүдэн энэ үйл явц удааширч байгааг онцлоод шүүх байгуулах явц удааширч байгаа гол шалтгаануудыг дурдсан байна. Үүнд:

Олон улсын улс төрийн хүсэл зоригийн хомсдол – ОХУ-ын нөлөөнөөс болж зарим улс орнууд, ялангуяа Өмнөдийн улс төрийн блок үүнийг Европын асуудал гэж үзэж, идэвхтэй дэмжихээс зайлсхийж байна.

Төрийн тэргүүний халдашгүй эрх – ОХУ-ын ерөнхийлөгчийг шүүхэд татах нь олон улсын эрх зүйн шинэ сорилт болох тул зарим улс уг үйл явцаас эмээж байна.

ОХУ-ын НҮБ-ын Аюулгүйн Зөвлөлийн гишүүнчлэл – Югослав, Руандагийн трибуналуудыг НҮБ-ын Аюулгүйн Зөвлөл байгуулж байсан бөгөөд ОХУ НҮБ-ын Аюулгүйн Зөвлөлийн байнгын гишүүн тул ийм шийдвэрийг хориглох эрхтэй.

Оросын дайны гэмт хэргийн хамгийн ноцтой хэсэг нь Украин хүүхдүүдийг хууль бусаар олноор нь Орос руу хүчээр авч явах явдал бөгөөд үүнтэй холбоотойгоор ОХУ-ын Ерөнхийлөгч Путин болон Мария Львова-Белова нарын эсрэг Олон улсын эрүүгийн шүүх баривчлах шийдвэр гаргасан. Гэсэн ч түүнд бусад дайны гэмт хэрэгтэй холбоотой шинэ ял оноох үйл явц удаашралтай байна.