Хог хаягдлын ачилт, тээвэрлэлтийн үйлчилгээний менежментийг сайжруулах ажлын хүрээнд нийслэлийн хэмжээнд 18-21 цагаас бусад цагуудад хог хаяхыг хориглолоо. Үүнтэй холбоотойгоор хог хаягдлыг тээвэрлэх ажлыг авто замын хөдөлгөөний ачаалалтай уялдуулан шөнийн цагийн хуваарьт шилжүүлээд байна. Энэ талаар УБЗАА-ны Орчны бохирдол, хог хаягдлын, удирдлагын хэлтсийн дарга Б.Мөнх-Эрдэнэ мэдээлэл хүргэлээ.

Тэрээр "Дүүрэг бүрд тодорхой чиглэлүүдийг өгсөн бөгөөд хог хаягдлын хууль болон холбогдох хууль журмын хүрээнд дүүргийн Засаг дарга болон хороод үүнийг хэрэгжүүлэх үүрэгтэй. Иргэн, аж ахуй нэгжүүд 18-21 цагийн хооронд хогоо хаяж байхаар болсон. Түгжрэл ихтэй энэ үед шөнийн тээвэрлэлтээр хогоо тээвэрлэх чиглэл өгсөн байгаа. Мөн хогны менежментийг сайжруулахын тулд ангилан ялгалт хийж дахивар авах хогийн савнуудыг байршуулах ажлуудыг нэгдүгээр улиралдаа багтаахаар ажиллаж байна.

Хороо дүүргүүд хог хаягдлын хяналтыг сайжруулах болон зориулалтын бус газарт хог хаяхгүй байх, ангилан ялгах гэсэн чиглэлийг эрчимжүүлэн ажиллах хэрэгтэй.

Улаанбаатар хотын захирагчийн ажлаас жил бүр их цэвэрлэгээний ажлыг зохион байгуулдаг. Энэ жил зургаан удаагийн их цэвэрлэгээг төлөвлөөд байна. Хоёрдугаар сарын 22, 23-ны өдрүүдэд Цагаан сарын урьдчилсан их цэвэрлэгээг хийхээр дүүргүүдэд тушаал хүргүүлсэн. Аж ахуй нэгжүүд орчныхоо 50 метр, иргэдийн хувьд хашаа хорооныхоо ойр орчмыг цэвэрлэх үүрэгтэй" гэлээ.