Оюу Толгой компани Монгол Улсын эдийн засгийн гол хөдөлгөгч хүчний нэг бөгөөд нөөц, олборлолтын цар хүрээгээрээ дэлхийд тэргүүлэх зэсийн уурхайн нэг билээ. Нийтдээ 15 тэрбум ам.долларын хөрөнгө оруулалт хийгдсэн, 20,000 гаруй хүнийг ажлын байраар хангаж, жил бүр улсын төсөвт тэрбум гаруй ам.долларын орлого оруулдаг томоохон төсөл юм. Тэгвэл Монгол Улсын эдийн засгийн 20 хувийг бүрдүүлдэг тус компанийн 2024 оны дөрөвдүгээр улирлын тайлантай танилцацгаая.
2024 оны дөрөвдүгээр улиралд гэмтэл, бэртлийн давтамжийн үзүүлэлт 200,000 хүн/цаг тутамд 0.17 ноогдож байгаа нь Рио Тинто группийн хэмжээнд аюулгүй ажиллагааг хамгийн сайн хангадаг уурхайн нэг болж байгаа аж. Тус компани энэ онд нийт 186,556 хүн/цагийн сургалтад ажилтнуудаа хамруулан ур чадварыг нь өсгөсөөр байна гэжээ.
Хамгийн онцлууштай нь нийт ажиллах хүчний 97.5 хувийг монгол иргэн бүрдүүлдэг байна. Мөн нийт ажиллах хүчний 23.3 хувийг эмэгтэй ажилчид бүрдүүлж байгаа аж.
Оюу Толгой компани тогтвортой хөгжилд чиглэсэн төслүүдэд 2024 оны дөрөвдүгээр улирлын байдлаар нийт 187.5 тэрбум төгрөгийн санхүүжилт олгосноос гадна 435 тэрбум төгрөгийг татвар хураамж, бусад төлбөрт төлжээ. 2024 оны дөрөвдүгээр улиралд ус дахин ашиглалтын зорилт 80 хувь байсан бөгөөд зорилтоо давуулан 88.4 хувьд хүргэсэн байна. Мөн тус компанийн зэсийн үйлдвэрлэл 2023 оны IV улиралтай харьцуулахад 63%-иар өссөн гэх өндөр үзүүлэлттэй тооцоо гарчээ. Түүнчлэн үндэсний компаниудтай хийсэн худалдан авалт, бусад хамтын ажиллагаа, төсөвт төлж буй татвар, хураамж, үндсэн ажилчдын цалинд 2010 оноос хойш 47.4 их наяд төгрөг зарцуулсан байна.
"Оюу толгой" компани Монгол Улсын нийгэм, эдийн засгийн хөгжилд оруулсан хувь нэмрээрээ хоёр дахь жилдээ "ТОП-100 аж ахуйн нэгж"-ийн жагсаалтыг тэргүүлсэн. 2024 онд үндэсний компаниудтай хийсэн худалдан авалт, татвар, хураамж, ажилчдын цалин зэрэгт нийт 7 их наяд төгрөг зарцуулсан байна. Мөн тус компанийн 30 ханган нийлүүлэгч "ТОП-100 аж ахуйн нэгж"-ийн жагсаалтад багтжээ.
Гүний уурхайн бүтээн байгуулалт
Гүний уурхайн агааржуулалтын хойд амын нэвтрэлт 1,175 метр, урд амын нэвтрэлт 1,131 метрт хүрч, үндсэн нэвтрэлтийн ажил амжилттай дуусжээ. Эдгээр 10 болон 11 метрийн диаметртэй агааржуулалтын амууд нь дэлхийн хамгийн томд тооцогдож байна.
Хөдөлмөрийн нөхцөл сайжруулалт
2024 оны арваннэгдүгээр сарын 21-нд "Оюу толгой" компани Үйлдвэрчний эвлэлүүдтэй хамтран ажилтнуудын хөдөлмөрлөх нөхцөлийг сайжруулах, тогтвортой гурван жилийн хугацаатай Хамтын гэрээг байгууллаа.
"100 сая мод" хөтөлбөрийн хүрээнд Дархан-Уул аймгийн Шарын гол сумын Хар Ямаатын ам, Хонгор сумын Хургад, Цэхэр, Бага Ноёны амуудад 215.5 га талбайд газрын нөхөн сэргээлт хийж, Сэлэнгэ аймгийн Алтанбулаг сумын Байт ууланд 400 га талбайд 1 сая мод тарьжээ. Мөн дрон ашиглан мод тарих технологийг Монголд анх удаа туршиж, үр дүнтэй болохыг баталгаажуулсан байна.
Боловсролын хөрөнгө оруулалт
"Аж үйлдвэр - Академи"-ийн түншлэлийг дэмжих зорилгоор "Үйлдвэрлэлийн судалгааны хөтөлбөр"-ийг дахин хэрэгжүүлж, их дээд сургуулийн багш, судлаачид, оюутнуудад "Оюу толгой" компанийн хэрэгцээт судалгаанд оролцох боломжийг олгож байна. Мөн Залуусын хөгжлийн хөтөлбөрөө Дорноговь аймагт өргөжүүлэн, Сайншанд сумын ерөнхий боловсролын сургуулийн 12-р ангийн 52 сурагчийг хамруулж байгаа аж. Түүнчлэн, өсвөр үеийнхний сэтгэл зүй, нөхөн үржихүйн эрүүл мэндийг дэмжих "Гэрэлт" төслийг тав дахь жилдээ хэрэгжүүлж, өмнөх жилүүдэд хамрагдсан 17 сургууль бүгд мэргэжлийн сэтгэл зүйчтэй болжээ.
Эдгээр үйл ажиллагаа нь "Оюу толгой" компанийн Монгол Улсын хөгжилд оруулж буй хувь нэмэр, байгаль орчны хамгаалал, боловсролын салбарт хийж буй хөрөнгө оруулалтыг тодотгож байна.
