УИХ-ын даргын захирамжаар Татварын багц хуулийг шинэчлэх ажлын хэсэг өнөөдрөөс эхлэн татварын тогтолцоо, өнөөгийн нөхцөл байдал, шинэчлэл сэдвээр цуврал хэлэлцүүлэг зохион байгуулж байна. Тус хуулийн ажлын хэсгийн ахлагч УИХ-ын гишүүн Х.Ганхуягаас хуулийн шинэчлэл, цар хүрээний талаар тодрууллаа.

-Татварын багц хуулийн шинэчлэлийг хаврын чуулганд өргөн барина гэсэн. Ямар хүрээнд өөрчлөлт хийхээр зорьж байна вэ?

-Одоогийн байдлаар санал хэлэхэд эрт байна. Орон даяар саналуудаа цуглуулж байна. Өнөөдрийн байдлаар гэхэд 110 мянган санал ирсэн. Бид дөрөв дэх өдөр дахин хоёр, гурван хэлэлцүүлэг хийнэ. Байнгын хороо, татвар, Сангийн яаманд ч саналуудыг авч байна. Ажлын хэсэг энэ саналуудыг нэгтгээд Сангийн яаманд хүргүүлнэ. Сангийн яам хуулийн төслөө боловсруулаад Засгийн газрын хуралдаанаар хэлэлцүүлнэ.

Саналууд гарсны дараа бид хуулийн төсөлд оруулах нэмэлт өөрчлөлтүүдээ тусгана. Ингээд 2-р сарын дундуур D парламент дээр тавьж иргэдээс хуулийн төсөл дээрээ нээлттэй санал авна. Өнөөдрийн хэлэлцүүлгүүд бол манай татварын тогтолцоо юун дээрээ болохгүй байна гэдэг асуудлуудыг иргэд, ААН-үүдээс сонсоно.