Сэтгэл гутрал үүсэх магадлалд ген чухал үүрэг гүйцэтгэдэг бөгөөд энэ төрлийн хамгийн өргөн хүрээтэй судалгаанд урьд өмнө мэдэгдээгүй байсан 293 генетикийн хувилбаруудыг сэтгэл гутрал үүсэх нөхцөлтэй холбож тайлбарлажээ.

Судалгаанд таван сая гаруй хүний ​​нэрээ нууцалсан мэдээллийг ашиглажээ. Тус генетикийн судалгааг 29 улсын сэтгэл гутралтай гэж оношлогдсон 688,808 хүн, эмгэггүй 4,3 сая хүний ​​мэдээлэлд үндэслэж хийсэн бөгөөд өнөөг хүртэл хийгдсэн сэтгэл гутрал, генетикийн талаарх хамгийн том судалгаа болж байна.

Судалгааг явуулсан олон улсын судлаачдын баг сэтгэл гутралын эмчилгээг хүн бүрийн удамшлын бүтцэд тулгуурлан хийх боломжтой тул илүү нарийн, хувийн шинж чанартай болгох боломжийг нээж өгч байна гэжээ. Олон сая хүн амтай улс орнуудын генетикийн эрсдэлт хүчин зүйлсийг тодорхойлсноор угсаатны хувьд сэтгэл гутралын эрсдэлийг урьдчилан таамаглах боломжтой болно гэсэн үг юм. Ингэснээр генийн нөлөөллийн талаар илүү гүнзгий ойлголтыг авч, энэ талын эмчилгээг сайжруулах ач холбогдолтой аж.

Тэдгээр генүүд тус бүртээ сэтгэл гутралд орох эрсдэлийг бага хэмжээгээр нэмэгдүүлдэг ч хэд хэдээрээ хосолсноор илүү их нөлөөтэй байж болно. Эдгээр генетикийн нөлөөлөл бидний хэрхэн унтдаг, юу иддэг зэрэг сэтгэл гутралд хүргэх эрсдэлт хүчин зүйлсийг нэмэгдүүлдэг байна.

Судлаачид өөрсдийн тодорхойлсон генетикийн хувилбаруудыг тархины мэдрэлийн эсүүд, ялангуяа гиппокамп болон амигдала тархины бүс дэх өдөөх мэдрэлийн эсүүдтэй холбож чаджээ. Энэ нь сэтгэл гутралыг сэтгэлийн түгшүүр, Альцгеймерийн өвчин гэх мэт тархины бусад асуудлуудтай хэрхэн холбоотой болохыг харуулж байна гэжээ.

“Судалгаагаар сэтгэл гутралд нөлөөлдөг олон зуун генетикийн хувилбаруудыг илрүүлсэн. Сэтгэл гутрал маш их тархсан эмгэг учраас бидэнд түүний биологийн шалтгааны талаар сурах зүйл их байна” гэж судлаач Льюис хэлжээ.

Эх сурвалж: https://www.sciencealert.com/breakthrough-global-research-finds-293-new-genetic-links-to-depression