Нийслэлийн Засаг дарга бөгөөд Улаанбаатар хотын захирагч Х.Нямбаатар "20 минутын хот" концевцын хүрээнд ирэх жилүүдэд хийх бүтээн байгуулалтын ажлаа танилцуулсан. Энэ хүрээнд түгжрэлийг бууруулах үүднээс томоохон зах, худалдааны төвүүдийн төлөвлөлтийг өөрчилж Баянзүрхийн хуучин товчоо орчимд Нарантуул болон Да хүрээ захыг хосолсон байдлаар төлөвлөх талаар УИХ-ын нэгдсэн хуралдаанд тайлбар өгөв.

Тэрээр "Туулын хурдны зам 33 километр байна. Бид тавдугаар сарын 1-н гэхэд барилгын ажлыг эхлүүлэхээр төлөвлөж байгаа. Нэгдүгээр сарын 28,29-ний өдрүүдэд тендерээ зарлаж шалгаруулалтыг дөрөвдүгээр сард эцэслэж, тавдугаар сарын 1-н гэхэд гэрээгээ байгуулж ажлаа эхлүүлэхээр төлөвлөсөн. Ажил эхэлснээс хойш 24 сарын дотор дуусгах төлөвлөгөөтэй байна.

Бид Туулын хурдны замыг эхлүүлсний дараа худалдааны төвүүд болох Нарантуул, Да хүрээ, Хархорин, Барс зэрэг томоохон худалдааны төвийн удирдлагуудтай хэлэлцээр хийнэ. Урьдчилан төлөвлөсний дагуу Баянзүрхийн хуучин товчооны орчимд Нарантуул болон Да хүрээг хосолсон байдлаар төлөвлөлт хийх талаар боловсруулж байна. Баруун талд нь Нарантуул, Да хүрээ худалдааны төвийг хосолсон байдлаар үйл ажиллагааг нь явуулах болно. Иймд Улаанбаатар хот руу орох шаардлагагүй хурдны замынхаа нэг гарц дээр худалдааны төвөөр үйлчлүүлэх боломжтой" гэв.

Нийслэл хотод үйл ажиллагаа явуулж байгаа зах, худалдааны төвүүдийг хотоос гаргана гэдэг асуудал анх удаа яригдаж байгаа зүйл биш. Зах худалдааны төвүүдийг нүүлгэх ажил 15 жилийн турш яригдаж байгаа ч хэрэгжилгүй өнөөдрийг хүрсэн.

Томоохон зах худалдааны төвүүдийг нүүлгэх асуудлыг дараах байдлаар ярьж байжээ.

-2007 онд Нийслэлийн захирагч асан Ц.Батбаяр зах, худалдааны төвүүдийг нүүлгэх саналыг анх гаргасан. 

-2016 онд Нийслэлийн Засаг дарга асан С.Батболд "Хотыг баруун тийш тэлнэ. Түгжрэл сааруулах зорилгоор "Нарантуул", "Да хүрээ" зэрэг захуудыг ажиллаж байх хугацаандаа нэн тэргүүнд нүүлгэн шилжүүлнэ" гэж байв. 

-2018 онд Хотын дарга асан С.Амарсайхан барилгын зах болон бусад томоохон худалдааны төвийг нүүлгэх шийдвэр гаргасан байдаг. Үүний хүрээнд захуудыг нүүлгэх ажлын хэсэг байгуулж байсан.

-2022 онд Нийслэлийн захирагч асан Д.Сумъяабазар хотын баруун зах буюу Сонгинохайрхан дүүрэгт 28 га газар төлөвлөж захуудыг байршуулна гэсэн байдаг.

Харин одоогийн хотын дарга Х.Нямбаатар, Туулын хурдны замыг барихтай холбогдуулан Да хүрээ, Нарантуул захыг Баянзүрх товчооны орчимд нүүлгэхээр төлөвлөж байгаагаа танилцууллаа. Туулын хурдны замыг 20-30 сарын дотор барьж дуусгана гэх тооцоолол бий.