Цагаан сараар шинийн 1, 2, 3-нд буюу баярын гурав хоног бүх нийтээр амардаг. Сүүлийн үед Цагаан сараар гуравхан хоног амрах нь олон талаар учир дутагдалтай байгаа учраас амралтын хоногийг нэмэх талаар олон нийтийн дунд хэлэлцүүлэг өрнөх болсон. Тухайлбал, энэ жилийн Цагаан сарын өдрүүд амралтын хоёр өдөр таарч байгаа учраас хөдөө орон нутаг рүү явах боломжгүй, хугацаа богино байгааг иргэд учирлаж буй.

Тэгвэл Засгийн газраас буюу Гэр бүл, хөдөлмөр нийгмийн хамгааллын сайд Л.Энх-Амгалан Нийтээр тэмдэглэх баярын болон тэмдэглэлт өдрүүдийн тухай хуульд нэмэлт, өөрчлөлт оруулах хуулийн төслийг өргөн барихаар бэлтгэж байгаа аж. Тус өөрчлөлтөөр Цагаан сар болон Үндэсний их баяр наадмаар тус бүр 10 хоног амрах өөрчлөлтийг хийхээр ярьж байгааг эх сурвалж мэдээллээ.

Хуульд өөрчлөлт оруулахдаа, нийтээр амардаг баярын өдрийн тоог нэмэлгүйгээр зохицуулахаар төлөвлөж байгаа аж. Тодруулбал, Олон улсын эмэгтэйчүүдийн эрхийг хамгаалах өдөр, Бурхан багшийн дүйчин өдөр гэх мэт нэг өдөр амардаг өдрүүдийг бүх нийтийн амралтын өдөр бус тэмдэглэлт өдөр болгон өөрчлөх бололтой.

Засгийн газар Цагаан сар, наадмаар 10 хоног амрах хуулийн төсөл өргөн барьсны дараа УИХ-аар хэлэлцэн хоногт өөрчлөлт оруулах боломжтой юм.