Засгийн газрын хуралдаанаас гаргасан шийдвэрийн талаар Хууль зүй, дотоод хэргийн сайд О.Алтангэрэл танилцууллаа.

Өнөөдрийн Засгийн газрын хуралдаанаар төрийн байгууллага, албан тушаалтнаас иргэд, аж ахуйн нэгжид учруулсан хохиролтой холбоотой асуудлыг хэлэлцсэн байна. Тодруулбал, төрийн албан хаагчид иргэдийг хохироодог, хууль бусаар ажлаас нь халж, төр нөхөн олговор олгодог.

Хууль зүй, дотоод хэргийн яам, Улсын ерөнхий прокурор, Ерөнхий аудитад шаардлага хүргүүлж, нэгдсэн мэдээллийн баазтай болох шийдвэр гаргасан байна. Ингэснээр төрд учруулсан хохирлыг буруутай албан тушаалтнуудаа барагдуулах боломж бүрдэх аж. Сүүлийн таван жилийн хугацаанд үндэслэлгүй ажлаас халагдсан иргэдэд төрөөс 60 гаруй тэрбум төгрөгийн нөхөн олговор олгожээ. Гэхдээ энэ мөнгийг буруутай албан тушаалтнууд нь төрд төлөөгүй байна.

Энэ талаар Хууль зүй дотоод хэргийн сайд О.Алтангэрэл "Хүнийг ажлаас халаад, шүүхээр үндэслэлгүйгээр халсан нь тогтоогддог. Ингээд тухайн хүний цалинг төрөөс гаргаж өгдөг. Гэтэл энэ мөнгөө буруутай албан тушаалтан төрд өгдөггүй. Тиймээс төрд хохирол учруулсан хохирлоо буруутай албан тушаалтнууд нь барагдуулдаг байх журмыг Засгийн газрын хуралдаанаар хэлэлцсэн" гэлээ.