“Эрх чөлөөний эвсэл” намаас зохион байгуулж буй “Засгийн газар огцор” жагсаалын эргэн тойронд юу болж буйг тоймлон хүргэж байна.

11:00 цаг: Жагсаал эхэллээ

“Эрх чөлөөний эвсэл” намынхны уриалсан “Засгийн газар огцор” нэртэй жагсаал Төв талбайд эхэлж жагсагчид цуглаж эхлэв. Уг жагсаалын зорилгыг тэд утаа, түгжрэл, ядуурал, авлига, татвар, ажилгүйдэл хэмээн тайлбарлаж буй. Түүнчлэн, жагсаал зохион байгуулагчид ямар нэгэн тайлбар сонсож хэлэлцээр хийхгүйгээр эцсийн үр дүнд хүртлээ жагсана гэдгээ илэрхийлээд байгаа юм. Жагсаал өнөөдрөөс нэгдүгээр сарын 22 хүртэл үргэлжлэх юм байна.

14.00 цаг: Жагсагчид автозамын хөдөлгөөнд саад учрууллаа

Жагсагчид Ерөнхий сайд Л.Оюун-Эрдэнэ, Хотын дарга Х.Нямбаатар нарыг төв талбайд ирж уулзахыг шаардаж, зам хааж зогссон байдалтай байна. Тодруулбал, ГХЯ яамны хойд талын болон Төв шуудангийн уулзварыг хааж жагссан нь автозамын хөдөлгөөнд саад учруулж жолооч нарыг бухимдуулав.

Үүнтэй холбоотойгоор төв зам дамжин өнгөрдөг 15 чиглэлийн автобусны хөдөлгөөнд саад учирч, түгжрэл үүслээ. Жагсагчид төв талбай тойрон алхахдаа хүмүүсийг нэгдэхийг уриаллаа.

16:00 цаг: Жагсаалыг тайван замаар зохион байгуулахыг уриалав

Д.Сүхбаатарын талбайд болж буй жагсаалтай холбогдуулан Хүний эрхийн үндэсний комиссоос цугласан олонд хандан тайван жагсаж үзэл бодлоо илэрхийлэх эрхээ эдлэхийг санууллаа. Жагсагчид “Засгийн газрыг шууд огцруулах биш утаа, түгжрэл арилгах, татварын дарамтаас чөлөөлөх зэрэг тодорхой шийдлүүдээ танилцуулахыг шаардаж байна. Энд ард иргэдийг турхирах гэсэн хүмүүс олон байна. Гэхдээ чин сэтгэлээсээ цаг заваа гарган ирж оролцож буй хүмүүс ч бий” гэсэн байр суурийг илэрхийлцгээж байна.

17:00 цаг: Жагсагчид төрийн ордон руу орох гэж дайрлаа

Жагсагчид хүч хэрэглэн Төрийн ордон руу орох оролдлого хийв. Түүнчлэн, Төрийн ордны шатан дээр иргэд бөөгнөрөн гарч Засгийн газар огцрохыг шаардлаа. Цагдаагийн байгууллагаас хүч нэмэхээр ирсэн ч иргэд цагдаа нарыг төрийн ордон руу оруулсангүй. Төрийн ордон дотор буун дуу болон шил хагарч буй чимээ сонсогдлоо. Жагсагчид тасралтгүй “Засгийн газар огцор” хэмээн орилсоор байна.

18:00 цаг: Маргааш ч дахин жагсана

Жагсаал тарах шинжтэй болж хүмүүс багасаж байна. Жагсаал зохион байгуулагчдын зүгээс эцсийн үр дүнд хүртлээ жагсана гэдгээ илэрхийлээд буй.