Улсын хэмжээнд инфляц 2024 оны арванхоёрдугаар сард 9 хувьтай гарсныг Үндэсний статистикийн хорооноос танилцууллаа.

Энэ нь өмнөх оны мөн үеэс хэрэглээний бараа үйлчилгээний үнэ 9 хувиар өссөн байгааг илтгэж буй юм. Ийнхүү инфляц өсөхөд бензин, түлшнээс бусад импортын барааны үнэ 2.9 нэгж хувиар (32.2%), мах, хатуу түлшнээс бусад дотоодын барааны үнэ 4.8 нэгж хувиар (53.3%) өссөн нь нөлөөлсөн гэжээ.

Хэрэглээний бараа, үйлчилгээний үнэ 2024 оны арванхоёрдугаар сард

өмнөх оны мөн үеэс 9.0 хувиар өсөхөд:

• хүнсний бараа, ундаа, усны бүлгийн үнэ дүнгээрээ 8.9 хувь (согтууруулах бус ундааны дэд бүлгийн үнэ 8.5 хувь),
• хувцас, бөс бараа, гутлын бүлгийн үнэ дүнгээрээ 9.4хувь,
• орон сууц, ус, цахилгаан, хийн болон бусад түлшний бүлгийн үнэ дүнгээрээ 23.0 хувь,
• гэр ахуйн тавилга, гэр ахуйн барааны бүлгийн үнэ дүнгээрээ 7.4 хувь, зочид буудал, нийтийн хоол, дотуур байрны үйлчилгээний бүлгийн үнэ дүнгээрээ 11.1 хувь,
• боловсролын үйлчилгээний бүлгийн үнэ дүнгээрээ 18.6 хувиар тус тус өссөн нь голлон нөлөөлсөн байна.

Түүнчлэн, Монголбанкнаас инфляц нэмэгдэн эрчимжиж, 2025 оны сүүлээс алгуур буурах хүлээлттэй байгааг хэлсэн юм.